_1749430366.gif)
_1743784132.gif)
धरान: मोरङको सुनबर्षी नगरपालिका १ का ७३ बर्षीय बमबहादुर राईले ६ बर्षको अन्तरालमा परिवारको ३ जना सदस्य क्यान्सरबाट गुमाएका छन् ।
सबैभन्दा पहिला २०६९ मंसिर २५ मा जेठो छोरा बालजित राईको ३३ बर्षकै युवा उमेरमा मलद्धारको क्यान्सरबाट मृत्यु भएको थियो । जेठो छोरा गुमाएको पीडा विर्सन नपाउदै २०७३ असारमा जीवन संगीनी राजमाया राईलाई पनि ६२ बर्षको उमेरमा गुमाए । लिभर(कलेजो)को क्यान्सरबाट राजमायाको मृत्यु भएको थियो । पछिल्लो पटक गत भदौंमा बमबहादुरको परिवारले कान्छी बुहारी विमला राईलाई क्यान्सरबाटै गुमाएको छ ।
कान्छी बुहारी विमला ३३ को उमेरमा गएको भदौ ३० गते पाठेघरको क्यान्सरबाट मृत्यु भएको थियो । उनलाई मंसिर २०७४ देखि सामान्य पेट दुख्न थालेपछि सप्तकोशी अस्पतालमा उपचारमा गएकी थिइन् । पाठेघरमा क्यान्सर भएको पत्ता लागेपछि त्यही अप्रेशन गरिएको थियो । पुनः केही समयपछि पेट दुख्न थालेपछि विमला विराटनगरस्थित कोशी अञ्चल अस्पतालमा जाँच गर्न गएकी थिइन । ‘त्यहाँ चेक गर्दा क्यान्सर फैलिएर पेटसम्म संक्रमण भएको पत्ता लाग्यो । २०७४ चैतमा फेरी त्यहाँ अप्रेशन भयो र क्यान्सर अस्पताल काठमाण्डौं रिफर गरिदियो,’ससुरा बमबहादुरले भने,‘किमो लगाउदा लगाउदै भदौ ३० मा बुहारीको पनि मृत्यु भयो ।’
युकेबाट १२०४ पाउण्ड सहयोग
पाठेघरको क्यान्सर पीडित विमलाको उपचारमा आर्थिक अभाव भएको भन्दै आफन्त हेमेश्वर राईले मिडियामार्फत सहयोगको आह्वान गरेका थिए । उनको आह्वानबारे युकेमा बसोबास गरिरहेका भोजपुर थुमपौवा खेसाङ कम्युनिटीका नेपालीहरुले थाह पाए । त्यसपछि, ब्रिटिश आर्मीमा कार्यरत सार्जेन्ट दिनेश राईको अगुवाईमा सहयोग संकलन अभियान शुरु भएको थियो । दुई समुह भएर युकेमा विमलालाई सहयोग संकलन अभियान चल्यो । एउटा समुह पौवाथुम कम्युनिटीका १६ जनाबाट ७१३ पाउण्ड संकलन भयो भने कोलचेस्टर राई कम्युनिटी युकेबाट २४ जनाले ४९१ पाउण्ड गरी कुल १२०४ पाउण्ड सहयोग जुट्यो ।
उक्त सहयोग रकम नेपाली १ लाख ८१ हजार ८ सय रुपैया दिनेश राईका जेठा दाजु धरान १५ निवासी महेश्वर राईमार्फत बुधबार पीडित परिवारको घरमा पुगेर हस्तान्तरण गरिएको थियो । नगद हस्तान्तरण कार्यक्रमका संयोजकसमेत रहेका महेश्वर राईका अनुसार सहयोग रकम मृतक विमलाकी ससुरा बमबहादुर राई र श्रीमान् इश्वरमान राईलाई घरमा पुगेर प्रदान गरिएको थियो । सुनबर्षी नगरपालिकाकी उपप्रमुख मञ्जु राईले सहयोग रकम हस्तान्तरण गर्दै थप ५० हजार रुपैया आफुले सहयोग गर्ने घोषणा पनि गरेकी छिन् । पीडित परिवारमा बमबहादुर, कान्छा छोरा इश्वरमान र नातीहरु ३ जना छन् ।
