_1725945816.gif)
लन्डन (एजेन्सी) – क्रिस्टल प्यालेसलाई पराजित गर्दै लन्डन क्लब चेल्सी इंग्लिस प्रिमियर लिग फुटबलको दोस्रो स्थानमा उक्लिएको छ । घरेलु टोली चेल्सीले क्रिस्टल प्यालेसलाई ३–१ ले पराजित गर्दै लिगको दोस्रो स्थानमा उक्लन सफल भएको हो ।
चेल्सीको ११ खेलबाट २७ अंक पुगेको छ । समान २७ अंक भएपनि गोल अन्तरमा चेलसीले लिभरपुललाई पछि पारेको हो । शीर्षस्थानको म्यानचेस्टर सिटीको २९ अंक छ ।
घरेलु मैदान स्टामफोर्ड ब्रिजमा आइतबार राति भएको खेलमा चेल्सीलाई जिताउन अल्भेरो मोराटाले २ तथा पेड्रो रोड्रिग्वेजले १ गोल गरे । क्रिस्टल प्यालेसका एन्ड्रोस टाउनसेन्डले एक गोल फर्काए ।
खेलको शुरुवातबाटै क्रिस्टललाई दवावमा राखेको चेल्सीको गोलको लागि ३२औं मिनेट कुर्नुपरेको थियो । पेड्रो रोड्रिग्वेजको पासमा मोराटाले गोल गर्दै चेल्सीलाई अग्रता दिलाएका थिए । पहिलो हाफमा १–० को अग्रता लिएको चेल्सीले दोस्रो हाफमा थप दुई गोल गर्दा १ गोल खान पुगेको थियो ।
दोस्रो हाफको शुरुमै ५३औं मिनेटमा एन्ड्रोसले गोल गरेपछि खेल १–१ गोलको बराबरीमा पुगेको थियो । त्यसपछि चेल्सीले उत्कृष्ट खेल पस्कियो । ६३औं मिनेटमा चेल्सीका डेभिड लुइजको हेडरलाई प्यालेसका गोलरक्षक वाइनी हेनेसीले जोगाएपनि ६५औं मिनेटमा मोराटालाई राक्न सकेन । इडेन हाजार्डको फ्रि किकलाई मोराटाले सदुपयोग गरेका थिए ।
७०औं मिनेटमा पेड्रो रोड्रिग्वेजले गोल गर्दै चेल्सीलाई ३–१ को सहज स्थितिमा ल्याएका थिए । इन्जुरी समयमा मोराटा ह्याट्रिक गर्नबाट चुके । मोराको शक्तिशाली प्रहारलाई गोलरक्षक हेनेसीले मुस्किलले बचाएका थिए । त्यसपछि थप गोल निस्कन नसक्दा चेल्सी ३–१ ले विजयी हुन सफल भयो ।
"हाम्रो खेलकुद बाट साभार गरिएको "
