 (13)_1727965004.gif)
धरान: प्रधानमन्त्री केपी शर्मा ओलीले करिब दुई वर्षअघि महासागरमा नेपाली झण्डा फरर्फराउदै पानीजहाज चलाउने घोषणा गरेका थिए । त्यसबेला उनको बोलीलाई सबैले मजाककोरुपमा लिएर उडाए । अहिले पनि उनको त्यो बोली पत्याउने नेपालीहरु छैनन् ।
समुद्रमा पानीजहाज चलाउने सरकारको योजनाले मूर्त रूप लिन्छ की लिदैन, त्यो भविष्यले बताउला । तर नेपालको सप्तकोशी नदीमा भने निजी क्षेत्रबाट नेपाली झण्डा फहराउदै साना पानीजहाज (जेट बोट) धमाधम सञ्चालन गर्न थालेका छन् । भर्खरै मात्र ‘बराहक्षेत्र मेरिन रिसोर्ट प्रालि’ले २५ जना क्षमताको नयाँ जहाज ल्याएको छ । उक्त जहाजमा नेपाली राष्ट्रिय झण्डा फहराउछ । चाइनिज प्राविधिकले सप्तकोशीमा परीक्षणकारूपमा जहाज चलाइरहेका छन् । प्रालिले एक सय यात्रु अट्ने ठूलो जहाज र १० जना क्षमताको साना जहाज ल्याउन लागेको प्रालिले जनाएको छ ।
सञ्चालक नवीन पौड्यालका अनुसार अहिले प्रालिले चार वटा जहाज चलाउन मिल्ने गरी सुनसरीको बराहक्षेत्र नगरपालिका १, चतराघाटमा आफ्नै पोर्ट र काउन्टर बनाइरहेको छ। प्रालिले चार वटा जहाज ल्याउन र कोसी टापुमा रिसोर्ट बनाउन गरी जम्मा करिब ८ करोड १२ लाख रुपैयाँको लगानी गरेको सञ्चालक पौड्यालको भनाई छ । उनले भने, ‘विपदमा परेकालाई र तत्कालै अस्पताल लैजानुपर्ने बिरामी, सुत्केरीलाई निःशुल्क सेवा दिनेछौँ।’
यसअघि ‘बराहक्षेत्र जल यातायात तथा पर्यटन सेवा प्रालि’ले २०७४ चैत १९देखि कियान नामको एउटा जहाज चलाइरहेको छ। जहाजले चतराघाट पोर्टबाट विशेष गरी धनकुटा, भोजपुर र खोटाङका गाउँमा जाने यात्रुलाई सेवा दिइरहेको छ । सप्तकोशीमा नेपाल रिभर ट्रान्सपोर्ट र वरुण वाटरवेजले २०५५ सालदेखि नै जेटबोट सञ्चालन थालेको थियो। बीचमा दक्ष चालक अभाव र विभिन्न समस्याले बन्द भएको बोट अहिले पुनः सञ्चालनमा छ । हालसम्म सुनसरीको चतराघाटबाट मात्र जहाज चलिरहेका छन्। तर, अब उदयपुरतर्फ पनि व्यवसायीले जहाज चलाउने तयारी गरिरहेका छन् । तस्बिर सौजन्य: गोपाल दाहाल
