 (13)_1727965004.gif)
धरान:चुरे फेदी सहायक राजमार्ग कायम गरिएपछि १४० फिट सडक मापदण्ड अनुसार धरानको धनकुटे रोड, रत्नमार्ग, चतरामार्गमा निर्माण भएका सयौं घरमा ठुलो क्षति हुने भएपछि उक्त राजमार्गलाई बाइपास गरिने भएको छ ।
उक्त सडक बाइपास गर्न सडक डिभिजन कार्यालय विराटनगर, क्षेत्रीय सडक निर्देशनालय दमकबाट सिफारिश भइसकेको छ भने रोड एलाइमेन्ट परिवर्तन गर्न सडक विभागकै योजना तथा डिजाइन महाशाखाले पनि बाइपास गर्न सम्भाव्यता अध्ययन गरिसकेको पाइएको छ । विभागको सम्भाव्यता अध्ययनले पनि धरानगेट तीनकुने हुदै घोपा क्याम्प जाने पुरानो मलाया रोड हुदै हाल वीपी प्रतिष्ठानको दक्षिणको गेट, फायरलाइनबाट सर्दुखोलासम्म पुर्याएर पुरानै एलाइमेन्टमा बाइपास जोड्न उपयुक्त हुने प्रतिवेदन दिइसकेको छ । तर, बाइपास गर्ने यो अध्ययनको एलाइमेन्ट स्वीकृत भएर निर्णय हुन भने बाँकी छ ।
२०७४ असोज ६ गते सडक डिभिजन प्रमुख जितेन्द्र कुमार चौधरीले पठाएको पत्रअनुसार वीपी प्रतिष्ठान जाने धनकुटे रोडलाई शुरु विन्दु कायम गर्दा नक्सा पास गरी निर्माण भएका १ हजार ५ सय घर घडेरीहरु क्षति पुग्ने र शहर पनि कुरुप हुने उल्लेख छ । उनले वैकल्पिक रुट धरानगेट तीनकुने, मलाया रोड, वीपी स्वास्थ्य विज्ञान प्रतिष्ठानको दक्षिणी गेट, फायरलाइन, सर्दुको ५ नं पुल हुदै चतरा जाने माग भएकोमा सो बाटोलाई कायम गर्दा स्थानीय जनताको न्युन क्षति हुने र व्यवस्थित सहर पनि जोगिने उल्लेख गरेका छन् ।
सडक विभागले सम्भाव्यता अध्ययन पश्चात बाइपासको निर्णय गर्नुअघि धरान चतरा गाइघाट हेटौडा सडक आयोजना हेर्ने उत्तर दक्षिणको व्यापारिक मार्ग विस्तार आयोजनाको समेत राय लिई निर्णय गर्ने टिप्पणी उठाएको छ । साथै, निर्णय गर्नुअघि सडक डिभिजनमार्फत धरान उपमहानगरपालिकालाई २०७४ फागुन महिनामा नै बाइपास गर्नु उपयुक्त भए नभएकोबारे धारणा माग गरेपनि जवाफ पठाउन ढिलाई गरेको छ । उपमहानगरपालिकाले जवाफ पठाउन ढिलाई गरेकै कारण हिजो मंगलबार धनकुटे रोड संयुक्त संघर्ष समितिले विरोध र्याली गर्दै उपमहानगरपालिकामा ज्ञापन पत्र बुझाएको थियो । ‘सडक डिभिजन, क्षेत्रीय निर्देशनालय, सडक विभागले सर्वे गरेर बाइपास नगरे ठुलो क्षति हुन्छ भन्ने भएपछि बाइपास गर्नु उपयुक्त हुने भनिसक्यो, अन्तिम निर्णय लिनुअघि धरान उपमहानगरलाई बाइपास गर्नु ठिक छ कि छैन भनेर सोधेको १० महिना बितिसक्यो कुनै जवाफ दिएको छैन,’संघर्ष समितिका निनामचन्द्र राईले भने,‘उपमहानगरपालिकाले चाडो निर्णय गरोस्, १४० फिट बाइपास होस्, र हाम्रो घरजग्गा फुकुवा होस् ।’
सडक आयोजनाको मापदण्ड १४० फिट कायम हुदा सयौं घरबारविहिन हुने अवस्था आएपछि प्रभावित सडक क्षेत्रका बासिन्दाहरुले दुई बर्षदेखि सडक बाइपास गर्नुपर्ने माग गर्दै आन्दोलन गरिरहेका छन् । संघर्ष समितिकै प्रस्ताव वमोजिम तीनकुनेदेखि नै बाइपास गर्ने बारे सडक विभागले सर्वे गरेको हो । सडक आयोजना कार्यालयले पनि माथिल्लो एलाइमेन्टबाट सडक लैजादा ठुलो क्षति पुग्ने भएकोले विकल्पमा जान सकरात्मक छ । त, नयाँ सर्वे अनुसारको रुटबाट लैजादा त्यतापटि पनि कुनै विवाद हुन नहुने आयोजना प्रमुख उमेशविन्दु श्रेष्ठ बताउँछन् । ‘माथि जोगाउनलाई तलबाट बाइपास गरेर लैजान सकिन्छ, तर त्यहाँ पनि विरोध भयो भने त लैजान सकिदैन । त्यहाँ पनि निजी जग्गा परेको छ भने त समस्या हुन्छ,’आयोजना प्रमुख श्रेष्ठले भने,‘सर्वे भएको छ, निर्णय हुन बाँकी छ ।’
सरकारले १४० फिट मापदण्ड कायम गरे अनुसार धनकुटे रोडको दाँयाबाँयाको घरजग्गा रोक्का छ । स्थानीयबासीले २०७२ चैतदखि किनबेच, घर बनाउन, बैंकिङ कारोबार गर्न पाएका छैनन् । यो सडकखण्डमा वडा नं ८, १०, १९, १८ र १७ पर्छ । २०७३ साउन महिनामा प्रभावित वडाबासीहरुले संघर्ष समिति गठन गरेर बाइपास गर्न निरन्तर पहल गरिरहेका छन् । विगतमा चुरे फेदी सहायक राजमार्ग भनिएको यो आयोजनालाई अहिले सरकारले गौरवको मदन भण्डारी राजमार्ग नामकारण गरेको छ । पुर्वमा इलामको पाटापुर(मेची)बाट शुरु हुने यो राजमार्ग महाकालीसम्म जोडिनेछ ।
२०७२ मा सहायक राजमार्ग कायम गरेपनि यो धनकुटे रोड, बुद्ध चोक हुदै रत्न मार्ग, चतरामार्गको मापदण्ड विगतमा सहरी सडककोरुपमा तत्कालीन धरान नगरपालिकाले २०५६ मा ६० फिट र सेड ब्याक दुवै तिर ६ फिट गरेर ७२ फिट कायम गरेको थियो । त्यस क्षेत्रमा सोही अनुसार घरनक्सा पास हुदै आएको थियो । दुई दिन अघि सोमबार मात्र धरान उपमहानगरपालिकाले यो सडक खण्डको मापदण्ड साविककै ७२ फुट कायम हुने निर्णय गरेको छ । उपमहानगरले यो निर्णय क्षेत्रीय सडक निर्देशनालय, सडक विभागसहित बोधार्थ स्थानीय विकास मन्त्रालय, भौतिक पुर्वाधार मन्त्रालय, अर्थमन्त्रलयहरुमा पनि पठाइने तयारी गरेको छ ।
