धरान(डेस्क): खेल नियममा खेलिन्छ, र खेलाडीहरु नियममा बाँधिएर अनुशासित भएर खेल्नुपर्छ । तर, एउटा खेल जित्नलाई खेलाडी वा क्लबले के सम्म गर्न सक्ला ? मोरङको सुनबर्षीस्थित अमरदहमा जारी तेस्रो ढल्के जोवन भेट्रान फुटबल प्रतियोगितामा भने खेलाडीहरुले भने शंकास्पद नागरिकता नै पेश गरेको पाइएको छ ।
प्रतियोगितामा सहभागी इटहरीस्थित द योङ ब्रदर्श भेट्रान क्लबका दुई जना खेलाडीले नक्कली नागरिकता पेश गरेर प्रतियोगिता खेलेको बताइएको छ । प्रतियोगिताको लागि उनीहरुले पशे गरेको नागरिकता शंकास्पद छ । ब्रदर्श क्लबका खेलाडी रमेशकुमार राजवंशीले पेश गरेको नागरिकता नक्कली भएको भन्नसक्ने थुप्रै आधार छ भने अर्का खेलाडी सन्देश श्रेष्ठको पनि २ वटा नागरिकता भेटिएको छ । कम उमेरका खेलाडीलाई बढी उमेरको खेलाडी बनाएर प्रतियोगितामा सहभागी गराउन क्लबले नक्कली नागरिकता बनाएर पेश गरेको हो ।
जेठ १ गते बुधबार धरान फुटबल फ्यान क्लब र बदर्शबीच खेल भएको थियो । उक्त खेलमा धरानको हार भएको थियो । उमेर बढी देखाएर युवा खेलाडी खेलाएको भन्दै धरानले प्रोटेस गरेपनि आयोजकले प्रमाण ल्याउनु भन्दै वेवास्ता गरेपछि धरानले थप प्रमाणहरु जुटाएको थियो । तर, आयोजकले झुटो नागरिकता पेश गरेर खेल जितेको इटहरीकै पक्षपोषण गरेपछि धरानका खेलाडीहरुले पत्रकार सम्मेलन गरेर शंकास्पद नागरिकता सार्वजनिक गरिदिएका हुन् । ‘हामीले प्रोटेस हाल्यौ, प्रमाण लेउ भन्यो । प्रमाण पनि जुटाएर दियौं, तर वास्ता नै गरेनन्, र आज हामीसँग भएको प्रमाणहरु सार्वजनिक गरेका हौं,’ धरान फुटबल फ्यान क्लबका व्यवस्थापनको जिम्मसमेत लिएका खेलाडी रामकृष्ण खड्काले भने,‘यस्तो झुट काम नगरेको भए हुन्थ्यो ।’
प्रतियोगितामा ३० बर्ष माथिको उमेर समुहका खेलाडीहरु मात्र सहभागी हुन पाउने भनिएको थियो । छोरा राजवंशी, बाबुको थर भने मण्डल इटहरीको ब्रदर्श क्लबबाट सहभागी खेलाडी रमेशकुमार राजवंशीको नागरिकता लेमुनेशन मात्र गरिएको छैन, राजवंशीको बुबा भने जलेश्वर मण्डल छन् । टंकीसिनवारी ४ ठेगाना भएका राजवंशीको जन्म मिति भने २०४४ फागुन २३ गते उल्लेख छ । आमाको नाम उल्लेख नभएको उनको नागरिकतामा जारी मिति पनि उल्लेख छैन । ‘त्यो नागरिकता नक्कली नै हो, स्टिगर पनि छैन र सरकारको स्टाम्प पनि छैन,’खड्काले भने ।
यस्तै, अर्का खेलाडी सुन्देश श्रेष्ठको २ वटा नागरिकता भेटिएको छ । इटहरी ८ ठेगाना भएको श्रेष्ठले प्रतियोगिता खेल्न पेश गरेको नागरिकतामा जन्ममिति २०३९ पुष १५ गते छ भने जारी मिति २०७२ पुष ३ गते उल्लेख छ । उनकै अर्को नागरिकतामा भने जन्ममिति २०४५ पुष १५ गते छ भने जारी मिति २०६३ असार ९ गते रहेको छ । ‘सन्देशले २०३९ सालकै नागरिकता देखाएर पनि खेल्न मिल्थ्यो, किन ४४ सालको देखाएको होला ? खेलाडीहरुबाट नै यस्तो फेक काम गरेको पाउदा ज्यादै दुःख लाग्यो,’खड्काले भने ।