 (13)_1727965004.gif)
धरान: डेंगु ज्वरोका विरामीको संख्या बढेको बढेकै छ । स्वास्थ्यकर्मी, स्वास्थ सेवा विभाग र मन्त्रालयको ध्यान पनि धरानमा देखिएको डेंगुको प्रकोप कसरी नियन्त्रण गर्ने भन्नेमा केन्द्रीत छ ।
धरानका जनप्रतिनिधिहरुले भने डेंगु नियन्त्रण गर्न अथवा लामखुट्टेको लार्भा नष्ट गर्न गम्भीरतापुर्वक चासो नदेखाएको आलोचना भइरहेको थियो । डेंगु देखा परेको झण्डै ४ सातापछि आज धरान उपमहानगरपालिकाले डेंगु नियन्त्रणको लागि लार्भा नष्ट गर्ने अभियान शुरुवात गर्यो । तर, यो शुरुवात गर्दा उपमहानगरपालिका परिसरमै बुधबार बिहान लामखुट्टेको लार्भा भेटियो । यो घटनाले नगरबासी सचेत नभएको भनिरहेका जनप्रतिनिधि, उपमहानगरपालिका आफै पनि कतिसम्म सचेत रहेछन् भन्ने प्रष्ट परेको छ ।
उपमहानगरपालिका परिसरमा भएको टायरमा लामखुट्टेको लार्भा भेटिएको हो ।र्यापिड रेस्पोन्स टिमका संयोजक डा.विजय खनालका अनुसार उपमहानगरपालिकाभित्र टायरमा भेटिएको लामखुट्टेको लार्भा डेंगु संक्रमण भएकै हो भन्ने नभएपनि हुनसक्ने सम्भावना पनि उतिकै छ । उनले भने,'कुन लार्भामा डेंगु छ, छैन भन्न सकिन्न । अहिले जुन किसिमले डेंगुको प्रकोप बढीरहेको छ, त्यसले चै हुनसक्ने सम्भावना धेरै छ ।'
र्यापिड रेस्पोन्स टिमका सदस्य महेश्वर राईले टायरमा पानी जमेको र त्यहाँ लामखुट्टेको लार्भा भेटेपछि मट्तिेल खन्याएका थिए । उनले र्यापिड रेस्पोन्स टिमका सबैलाई देखाएर टायरबाट पानी फालेका पनि थिए । ‘डेंगु नियन्त्रणको नेतृत्व गर्ने निकायमा नै लामखुट्टेको लार्भा भेटियो, यतिका दिनसम्म पनि कसैको ध्यान आफ्नो कार्यालयमा के अवस्था छ भनेर पुगेको देखिएन,’सदस्य राईले भने,‘आम सर्वसाधारण जनतामा के अवस्था छ, कति सचेत छन् भन्ने त परको कुरा भयो ।’
