 (13)_1727965004.gif)
धरान: डेंगु रोग नियन्त्रणमा गर्न धरानमा टोलस्तरमा समिति बनाएर घरदैलो अभियानको तयारी भएको छ । प्रदेश सरकारले सात दिनभित्र डेंगु रोग नियन्त्रणको निर्देशनसहित कार्ययोजना तयार गरेपछि उपमहानगरपालिकाले टोलस्तरमा अभियान टोली गठन गरेर कार्यान्वयन गर्न तयारी गरेको हो ।
उपमहानगरपालिकामा शुक्रबार बसेको बैठकले सबै वडाहरुमा कम्तीमा ४ देखि ८ वटासम्म सुरक्षाकर्मीसहित अभियान टोली गठन गरेर गर्ने निर्णय गरेको छ । त्यसअघि, प्रदेशस्तरीय सुरक्षा बैठकले डेंगु नियन्त्रणको लागि गठन हुने हरेक टोलीमा सुरक्षाकर्मी उपलब्ध गराउने निर्णय गरेको थियो । धरानको सर्वपक्षीय बैठकले सम्बन्धित टोलसँग नजिक रहेको वडा सदस्य संयोजक रहने गरी ९ सदस्यीय अभियान टोली गठन गर्ने निर्णय गरेको छ ।
टोलीमा टोल विकास संस्थाका अध्यक्ष सह संयोजक रहनेछन् भने टोल विकास संस्थाका २ जना सदस्य, विपी कोइराला स्वास्थ्य विज्ञान प्रतिष्ठान वा स्थानीय स्वास्थ्य संस्थाका २ जना प्राविधिक, महिला स्वास्थ्य स्वयमसेविका, सशस्त्र/जनपथ वा नगर प्रहरीबाट २ जना, रेडक्रस प्रतिनिधि र टोल विकासका सचिव सदस्य सचिवकोरुपमा रहनेछन् । ‘असार १ गतेदेखि ७ गतेसम्म दैनिकरुपमा घरदैलोमा गएर जमिनदेखि छतसम्म नारा दिएर लामखुट्टेको बासस्थान खोजेर लार्भा नष्ट गर्ने र प्रत्येक घरका सदस्यहरुलाई पनि त्यो काममा लगाउछौं,’कार्यवाहक मेयर मञ्जु भण्डारी सुवेदीले भनिन्,‘हामी बजेटको तयारीमा भएकोले वडा अध्यक्ष त्यसमा ब्यस्त हुन्छन्, त्यसैले सदस्यको संयोजकत्वमा टोलस्तरमा टोली गठन गछौं ।’
टोलीले अभियान सञ्चालन गरेर सबै घरमा पुगेर लार्भा नष्ट गरिसकेपछि त्यो टोलमा पानी अभाव हुन नदिने पनि बैठकको निर्णय छ । त्यसको लागि टोलीले उपमहानगरपालिकासँग समन्वय गरेर अभियान सम्पन्न भएको टोलमा पानीको व्यवस्थापन गरिने कार्यवाहक मेयर भण्डारीले बताइन् । ‘कुन कुन घरमा लार्भा नष्ट गरियो भनेर चिह्न पनि राख्छौं, अस्पतालबाट कति विरामी निको भएर घर फर्किए ? धरानको वास्तविक विरामी कति हो भन्ने तथ्यांक पनि निकाल्छौं,’उनले भनिन् । टोलीले घरदैलो अभियान गरेको घरको संख्या दैनिकरुपमा रेकर्ड राखेर वडा कार्यालयमा जानकारी गराउनेछ । टोलीले घर, पसलमा ३ दिन भन्दा बढी खुलारुपमा पानी नराख्न पनि सचेत गराउनेछ ।
