धरान : आज एकै दिन सुनसरीको धरान र मोरङको रंगेलीमा करेण्ट लागेर दुई जनाको ज्यान गएको छ ।

सुनसरी धरान ४, ठक्कर डाँडा बस्ने ६७ बर्षिय बिर्खबहादुर राईको करेन्ट लागेर मृत्यु भएको छ । आज बिहान ११ बजे आफ्नै घरमा रेडियो बजाउने क्रममा उनलाई करेण्ट लागेको थियो । प्रहरीका अनुसार रेडियोको ज्याक मल्टिपल्कमा जोड्ने क्रममा वृद्ध राई करेन्ट लागेर बेहोस भएका थिए । उनलाई उपचारको लागि बीपी कोईराला स्वास्थ्य बिज्ञान प्रतिष्ठान, घोपा पुर्याइएको थियो । प्रतिष्ठानमा नै उनको उपचारको क्रममा दिउँसो करिब साढे १२ बजे मृत्यु भएको अस्थाई प्रहरी पोष्ट घोपाले जनाएको छ ।

यसैगरी, रंगेली नगरपालिका ५ आपगाछीका १२ बर्षीय प्रमोद ऋषिदेवको आज दिउँसो १२:५० बजे करेन्ट लागेर मृत्यु भएको छ ।  आफ्नै घर छेउको काठमा विजुलीको पोल नजिक हिडिरहेको अवस्था अचानक उक्त विजुलीको पोल ढली नाङगो तारबाट करेन्ट लाग्दा ऋषिदेवको घटनास्थलमै मृत्यु भएको ईलाका प्रहरी कार्यालय रंगेलीले जनाएको छ ।