 (13)_1727965004.gif)
धरान:डेंगु प्रकोप क्षेत्र घोषणा भएको धरानमा डेंगुका विरामीहरु दिनप्रतिदिन बढीरहेको छ भने यही मौकामा निजी मेडिकलहरुले डेंगु जाँच गरेको शुल्क अत्यधिक महंगो लिएर ब्रह्मलुट गरिरहेको छ ।
एउटा डेंगु टेष्ट गरेको न्युनतम १५ सयदेखि ३ हजार भन्दा बढी पनि शुल्क लिएर निजी मेडिकलहरुले ब्रह्मलुट मच्चाइरहेका थिए । विपी कोइराला स्वास्थ्य विज्ञान प्रतिष्ठानमा डेंगु किट सकिएको र भए पनि जाँच गर्न धेरै लाम बस्नुपर्ने भएकोले सर्वसाधारणहरु निजी मेडिकलमा नै जाँच गर्न पुग्थे । जहाँ उनीहरुले महंगो शुल्क तिर्न बाध्य थिए ।
यसबारेमा समाचार प्रकाशन भएपछि आज धरान उपमहानगरपालिकाले धरानका निजी मेडिकलहरु तथा ल्याब सञ्चालकहरुलाई छलफलमा बोलाएर डेंगु टेष्टको शुल्क तोकेको छ । उपमहानगरपालिकका अनुसार अब धरानमा निजी मेडिकलहरुमा डेंगु टेष्ट गरेको मात्र ६ सय रुपैया तिर्नुपर्नेछ । कार्यवाहक मेयर मञ्जु भण्डारी सुवेदीको अध्यक्षतामा सरोकारवालहरुसँग भएको बैठकले यो निर्णय गरेको हो । उक्त शुल्कमा एनएस वान, अइजिजि र आइजिएम ३ वटा नै जाँच हुनेछ ।
कार्यवाहक मेयर भण्डारीले विपी प्रतिष्ठानमा किट सकिए पछि निजी मेडिकलहरुमा अत्यधिक महंगोमा जाँच गर्नुपरेको भन्ने जनगुनासो आएपछि सञ्चालकहरुसँग छलफल गरेर शुल्क तोकिएको बताइन् । कार्यवाहक मेयर भण्डारीले भनिन्,‘एउटा किटको ५ सय पर्ने रहेछ । त्यसमा कानुन वमोजिम २० प्रतिशत थप गरेर मात्र ६ सय लिने निर्णय भएको छ ।’
यस्तै, डेंगु नियन्त्रणको लागि उपमहानगरपालिकाको सम्पुर्ण कार्यक्रममा आवश्यकता अनुसार सम्पुर्ण स्वास्थ्यकर्मीहरुले आआफ्नो स्तरबाट सहयोग गर्ने पनि बैठकले निर्णय गरेको छ । निजी स्वास्थ्य सेवाहरुमा पनि निःशुल्क डेंगु जाँचको सेवा उपलब्ध गराउनको लागि प्रदेश र संघीय सरकारसँग पहल गर्ने पनि बैठकले निर्णय गरेको छ । धरान इमेजिङ सेन्टरका प्रबन्धक दिपेन्द्र निरौलाले भने,‘ यो महामारी कहिलेसम्म सरकारले अन्त्य गर्ने हो ? प्रष्ट भन्नुपर्छ भन्यौ हामीलाई सरकारले किट उपलब्ध गराएमा निःशुल्क डेंगु जाँच गर्न हामी पनि तयार छौं ।’
