_1725945816.gif)
धरान: तिजको अवसर पारेर महिला सञ्जाल धरानले तीन दिने महिला उद्यमी बजार प्रर्वद्धन तथा प्रर्दशनी मेला २०७६ आयोजना गर्ने भएको छ ।
सञ्जालले शनिबार होटल नवयुगमा पत्रकार सम्मेलन गर्दै यही भदौ ५, ६ र ७ गते धरान १२ स्थित जिएस मार्केट अगाडि रहेको खाली जग्गामा उद्यमी मेला आयोजना गर्ने जानकारी दिएको हो । महिला उद्यमीहरुको उत्पादनलाई प्रर्वद्धन गर्न र तिजलाई फरक शैलीमा मनाउन सन्देश दिने उद्देश्यले मेला आयोजना गरिएको सञ्जालकी अध्यक्ष सविता राईले बताइन् । ‘महिला सञ्जाल महिला हकहित तथा अधिकारको लागि गठन गरिएको भएपनि आर्थिकरुपमा सवल नभएसम्म महिलालाई हेर्ने दृष्टिकोण र हिंसामा कमी हुदैन, त्यसैले उद्यमशील बन्न प्रेरणा दिने उद्देश्यले महिला उद्यमी मेला लगाउने तयारी भएको हो,’अध्यक्ष राईले भनिन् ।
मेलामा महिला उद्यमीहरुले उत्पादन गरेका सामग्रीहरुलाई मात्र प्राथमिकता दिइने मेलाकी संयोजक तथा सञ्जालकी वरिष्ठ उपाध्यक्ष चेतना सेरेङले बताइन् । उनका अनुसार मेलामा महिला उद्यमीहरुले उत्पादन गरेका हस्तकलाका सामग्रीहरु, ढाका तथा अल्लोका कपडा, जुत्ता चप्पल, कास्यका सामग्रीहरु, हाते झोलाहरु, अर्गानिक तरकारी तथा बस्तु, नेपाली खाजाको परिकारलगायतका ३० वटा स्टल रहनेछ । ‘३ दिनसम्म तिज बिशेष नृत्य प्रस्तुती, नाटक मञ्चन र साना बालबालिकाहरुको जातीय पोशाकमा फेशन शो पनि आयोजना हुन्छ,’संयोजक सेरङले भनिन्,‘महिला उद्यमीहरुको उत्पादनलाई कसरी बजारीकरण गर्ने, चुनौतीहरु के के हुन्छन् भन्ने बिषयमा अन्र्तक्रिया पनि हुन्छ ।’
मेलामा ईलाम, झापा, मोरङ, धनकुटा, सुनसरी र काठमाण्डौंबाट पनि महिलाहरुको उत्पादनको स्टल रहने आयोजकले जनाएको छ । मेला बिहान ९ बजेदेखि साँझ ८ बजेसम्म सञ्चालन हुने आयोजकको भनाई छ । मेलामा स्वास्थ्य परीक्षणको लागि डा.सञ्जिव शर्माको नेतृत्वमा केएचडिसीको स्वास्थ्य शिविर पनि राखिने आयोजकले जनाएको छ । सँस्कृतिकोरुपमा मानिने तिज महिना दिनअघि देखि नै तडकभडकरुपमा मानिन थालिएपछि महिला सञ्जालले गत बर्षदेखि महिला उद्यमी मेला शुरुवात गरेको हो ।
गत बर्षको उद्यमी मेलाबाट महिला उद्यमीहरु उत्साहित भएकोले यो बर्ष पनि निरन्तरता दिएको अध्यक्ष राईले बताइन् । ‘गत बर्षको मेलाले उद्यमी महिलाहरु उत्साहित भएको पायौं, उहाँहरुको उत्पादन बजारीकरण हुनसक्यो, त्यसैले यो बर्ष पनि आयोजना गर्ने निर्णयमा पुग्यौं,’उनले थपिन् । उद्यमी महिलाहरुलाई प्रोत्साहन गर्न यस्तो प्रर्वद्धन मेला उपमहानगरपालिका वा उद्योग वाणिज्य संघले आयोजना गर्नुपर्ने सञ्जालकी सचिव कोपिला भटराईले बताइन् ।
