_1725945816.gif)
धरान: मंसिर १४ गतेको उपनिर्वाचनमा धरानको मेयरमा उम्मेदवारी दिएका २३ जना मध्ये २१ जनाको जमानत जफत भएको छ ।
निर्वाचन मतपरिणाम अनुसार मेयरमा विजयी तिलक राई र नेकपाका उम्मेदवार प्रकाश राईबाहेक अन्य कसैले पनि जमानत जोगाउन सकेनन् । आफ्नो जनमत थाह पाउन उम्मेदवारी दिएको समाजवादीले पनि आफ्नो जमानत जोगाउन सकेन । कुल खसेको मतमध्ये १० प्रतिशत मत ल्याउने उम्मेदवारको मात्र जमानत सुरक्षित हुन्छ । गएको उपनिर्वाचनमा कुल ५४ हजार ८ सय ४८ मत खसेको थियो । यसको १० प्रतिशत हिसाब गर्दा ५ हजार ८ सय ४८ मत ल्याउनुपर्ने हुन्छ । कांग्रेस र नेकपाबाहेक यो प्रतिशत कसैले पनि ल्याउन सकेनन् ।
कांग्रेसका उम्मेदवारले खसेको मतको २६ हजार ७ सय ९ मत पाए भने नेकपाका उम्मेदवारले २३ हजार ९ सय १४ मत पाए । जमानत जफत हुने उम्मेदवारहरुमा समाजवादी पार्टीका गजेन्द्र इस्वो, संघीय लिम्बुवान मञ्चका अमर इजम, साझा पार्टीका राजन श्रेष्ठसहित स्वतन्त्र उम्मेदवारहरु कसैले पनि जमानत जोगाउन सकेनन् । मत परिणाम अनुसार तेस्रो स्थान भएको संघीय लिम्बुवान मञ्चका उम्मेदवार इजमले १ हजार १ सय ३१ मत मात्र पाए भने अपेक्षा भन्दा न्युन मत पाएको समाजवादी पार्टीका इस्वोले ७ सय ५५ मत मात्र पाए । स्वतन्त्र उम्मेदवार हर्क साम्पाङले ४ सय २२ मत पाए भने अर्का स्वतन्त्र उम्मेदवार डा.अमृतकुमार राईले २ सय ३ मत पाए ।
