_1725945816.gif)
धरान : धरानमा औद्योगिक व्यापार मेला शनिबार औपचारिकरुपमा समापन भए पनि जुत्ता चप्पलको मेला भने जारी रहेको छ ।
औद्योगिक मेलासँगै पब्लिक हाइस्कुलको मैदानको पूर्वपट्टि सधै सोमबारे हटिया लाग्ने स्थान नजिकै छुट्टै जुत्ता–चप्पल मेला सञ्चालनमा छ । जुत्ता–चप्पलमा विशेष छुटको अफर राखिएकोले भीड बढेको आयोजकले जनाएको छ । जुत्ता–चप्पल मेलामा विशेषतः फेसनेबलदेखि स्कुले विद्यार्थीको जुत्ता–चप्पल सस्तो मुल्यमा पाइन्छ । जुत्ता–चप्पलमा विशेषगरी ग्यारेन्टी पनि दिइएको छ । ६ महिनादेखि एक वर्षको ग्यारेन्टी दिँदै जुत्ता–चप्पल बिक्री भइरहेको फुट वेयर मेनिफ्याक्चरल एशोसिएसन नेपालका कृष्ण फुयाँलले जानकारी दिए ।
'स्वदेशी वस्तुको प्रवद्र्धन हाम्रो अभियान’ भन्ने नाराका साथ धरानमा औद्योगिक व्यापार मेलासँगै जुत्ता–चप्पल मेला लगाइएको हो । अवलोकनकर्ताले स्वदेशी जुत्ता–चप्पल उद्योगहरू फस्टाएको भन्दै प्रशंसा गरेका छन् । मेलामा नेपालमै उत्पादित विभिन्न मोडलका जुत्ता–चप्पल राखिएको छ ।
जुत्ता मेलामा गोल्डस्टार, कोसेली, क्रस रोड, ल्याण्ड वाक, शिखर, हाइलाइफ, विएफडी आर हिल लगायतका कम्पनीका जुत्ता–चप्पल राखिएका छन् ।
‘धराने फेसनेबल सहर हो भन्ने हामीले बुझेका छौं, फेसनेबल जुत्तादेखि स्कुले विद्यार्थीका लागि चाहिने सबै प्रकारका जुत्ता–चप्पल, युवा, वृद्धवृद्धा सबैलाई फिट हुने सबै प्रकारका जुत्ता–चप्पल राखेको फुट वेयर मेनिफ्याक्चरल एशोसिएसन नेपालका कृष्ण फुयाँलले बताए । उनले भने यो मेलाबाट हामीले प्रत्येक धरानेको खुट्टामा नेपाली जुत्ता–चप्पल लगाउने योजना बुनेका छौं ।’
‘धेरैजसो दिइने छुट स्टलमै खुलाइएको छ’, उनले भने, ‘यसले उपभोक्तालाई सहज हुनेछ ।’ सयौं मोडेलका जुत्ता उपलब्ध हुने हुनाले ग्राहकलाई पनि छनोट गर्न सहज हुने आयोजकको भनाइ छ । स्वदेशी उत्पादनको प्रवद्र्धननका लागि मेला आयोजना गरिएको उनले जानकारी दिए ।
स्वदेशी जुत्ता–चप्पलको ब्राण्डलाई चिनाउनका लागि समेत मेला महत्वपूर्ण हुने उत्पादकहरूको अपेक्षा रहेको उनले बताए । जुत्ता मेला चैत्र १० गते सम्म लाग्ने सुनसरी उद्योग बाणिज्य संघले जनाएको छ ।
