धरान : सर्वसाधारणले मास्क प्रयोग गर्न छाडेपछि सङ्खुवासभामा ‘आफ्नै लागि मास्क’ अभियान शुरु गरिएको छ ।

उद्योग वाणिज्य सङ्घ र जिल्ला प्रहरी कार्यालयको संयुक्त आयोजनामा सर्वसाधारणलाई मास्क प्रयोगको बानी बसाउन अभियान थालिएको बताइएको छ ।

सदरमुकाम खाँदबारीका उद्योगी व्यवसायी र प्रहरीले सचेतना फैलाउने क्रममा हिजो खाँदबारीमा लाग्ने साप्ताहिक हाटमा मास्क प्रयोग नगर्नेहरूलाई कोरोनासँग बच्न सामाजिक तथा भौतिक दुरी कायम गर्दै नियमित मास्क प्रयोग गर्न आग्रह गरिएको थियो । सो क्रममा स्थानीय व्यवसायी र प्रहरीहरूले मास्क प्रयोग नगर्नेलाई निःशुल्क मास्क वितरण गरेका थिए । अभियानको पहिलो दिन खाँदबारी बजारमा दुई हजारभन्दा बढी मास्क वितरण गरिएको सङ्घका उपाध्यक्ष कृष्णभगत प्रधानले जानकारी दिए ।

जिल्ला प्रहरी कार्यालयका प्रहरी नायव उपरीक्षक नवराज मल्लका अनुसार लकडाउन खुलेसँगै जिल्लामा लापरबाही पनि बढ्दै गएकाले सम्भावित जोखिमलाई ध्यान दिँदै ‘आफ्नै लागि मास्क लगाऊ’ अभियान सञ्चालन गर्नुपरेको बताए । उनका अनुसार पहिलो चरणमा मास्क प्रयोग नगर्नेलाई सम्झाउने र यसपछि कारबाही गर्ने योजना रहेको बताए । ‘आफ्नै लागि मास्क लगाऊ’ अभियानलाई खाँदबारी नगरपालिकाले पनि सहयोग गर्ने नगरप्रमुख मुरारीप्रसाद खतिवडाले बताए ।