 (13)_1727965004.gif)
दमक : दमक नगरपालिकाले उपभोक्ता अधिकारको रक्षा र बजार व्यवस्थापनका लागि बजार अनुगमन गरेको छ ।
दमक नगरपालिका बजार अनुगमन समितिका संयोजक भीमप्रसाद पौडेलको नेतृत्वमा कर्मचारी, प्राविधिक तथा उपभोक्ता अधिकारकर्मी सहितको टोलीले बजार अनुगमन गरेको हो ।
टोलीले दमकका केही पेट्रोल पम्प, मासु पसल, खाद्य तथा किराना पसल, दुग्ध व्यवसाय, होटेल लगायतमा अनुगमन गरेको थियो । अनुगमनका क्रमका केही पसलमा खाद्य मिति गुज्रिएका बस्तु पनि भेटिएको र तत्कालै नष्ट गराइएको संयोजक पौडेलले बताए।
यस्तै पेट्रोल पम्पहरुमा गरिएको अनुगमनका क्रममा मात्रात्मक ठगी नदेखिएको भए पनि मिसावटको अवस्थाका बारेमा भने प्रयोगशाला परीक्षण जरुरी रहेको उपभोक्ता हित संरक्षण मञ्चकी केन्द्रीय उपाध्यक्ष सुवर्णप्रभा गुरागाँईले बताइन ।
केही होटलहरुमा भने भान्सा कोठा फोहोर भेटिएकाले सरसफाइमा ध्यान दिन टोलीले आग्रह गरेको छ ।
अनुगमनमा नगरपालिकाका विज्ञ, कर्मचारी सहित उपभोक्ता हित संरक्षण मञ्चका केन्द्रीय उपाध्यक्ष गुरागाँई, केन्द्रीय सदस्य मेघराज श्रेष्ठ, प्रदेश उपाध्यक्ष एवम् दमक अध्यक्ष डा.नवीन चापागाईँ लगायत सहभागी रहेको थिए ।
यस्तै मञ्चको टोलीले नगरपालिका परिसरमा नै उपभोक्ता सचेतना कार्यक्रम समेत सञ्चालन गरेको थियो । जसमा केन्द्रीय उपाध्यक्ष गुरागाँई, दमक कोषाध्यक्ष सुमित्रा वाङ्देल लगायतले उपभोक्ता शिक्षाका बारेमा सर्वसाधारणलाई जानकारी गराएकी थिइन ।
बजार अनुगमन अघि मञ्च एवम् नगरपालिकाको आयोजनामा उपभोक्ता अधिकार बारे कानुन निर्माण, बजार व्यवस्थापन, खाद्य स्वच्छता विषयमा अन्तरक्रिया समेत भएको थियो ।
नगरपालिकाका प्रमुख रोमनाथ ओलीले उपभोक्ता अधिकारको रक्षा र बजार व्यवस्थापनका लागि नगरपालिका नयाँ ऐन ल्याउन समेत तयार रहेको बताए । कुनै पनि बहाना र कारणले बजारमा ठगी हुने अवस्था सिर्जना हुन नदिइने उनले प्रतिबद्धता समेत जनाए।
