_1725945816.gif)
विराटनगर : नेकपा दाहाल-नेपाल समूहका नेता तीन पुर्वप्रधानमन्त्रीहरुले प्रधानमन्त्री केपी शर्मा ओलीलाई घुँडा टेकाएरै छाड्ने उद्घोष गरेका छन् । ओलीको शासन अव धेरै नटिक्ने उनीहरूको दाबी छ ।
नेकपा प्रदेश १ को आयोजनामा शुक्रवार विराटनगरमा आयोजित विरोधसभामा नेकपा अध्यक्ष पुष्पकमल दाहाल (प्रचण्ड) ले प्रधानमन्त्री ओली प्रतिक्रियावादीको एजेन्ट भएको दाबी गरे । राजा फाल्ने जनताले श्री ३ ओलीलाई पनि फाल्ने उनको विश्वास छ ।
ओलीको सेटिङलाई जनताले भत्काई छाड्ने अध्यक्ष दाहालले बताए । जरुर भए संसद् बैठक सुरु गरिने उनको भनाई छ । सर्वोच्च अदालतप्रति पूर्ण विश्वास रहेकाले अहिले नै त्यो काम नगरिएको दाहालले बताए । उनले भने,‘ सर्वोच्चले गर्ने फैसलाको विश्वास भएकाले धैर्य गरेका छौँ ।’
अहिले नै संसद् बैठक बस्न जरुरी नठानिएको अध्यक्ष दाहालले बताए । जनताले ५ वर्षका लागि मत दिएर पठाएकाले प्रधानमन्त्रीले भङ्ग गर्दैमा संसद् विघटन नहुने उनले बताए । उनले भने,‘ संसद् सुरु गरेर ओलीलाई कारबाही गरिन्छ ।’ संसद् हैन ओली भङ्ग भएको दाहालको भनाई छ । ओली प्रतिक्रियावादीको गोटी बनेर सामान्तबाद सामु लम्पसार परेको अध्यक्ष दाहालको आरोप छ ।
दाहाल–नेपाल समूहका अर्का अध्यक्ष माधवकुमार नेपालले नेपाली जनताको त्यागमाथि प्रधानमन्त्री ओलीले घात गरेको बताए । ओलीबाट संविधानको घाँटी रेट्ने काम गरेको नेपालले बताए । ओलीको ओरालो यात्रा सुरु भएका उनले बताए । उनले भने,‘ संविधान, गणतन्त्र, सङ्घीयता सिध्याउन खोज्न ओलीलाई घडा टेकाएरै छाड्छौँ ।’
पार्टी भन्दा माथि आँफुलाई ठान्ने व्यक्ति कम्युनिस्ट हुन नसक्ने अध्यक्ष नेपालको भनाई छ । ओलीको पार्टी नेकपा हुनै नसक्ने उनले दाबी गरे । नेता नेपालले भने,‘ ओलीको पार्टी भनेको तमासा पार्टी हो ।’ डमरु बजाउँदै केन्द्रीय सदस्य बाँडेका ओलीको अहिले अनुहार खुइलिँदै गएको नेता नेपालले बताए । प्रधानमन्त्री ओलीले चुनाव नगराउने उनले बताए ।
वरिष्ठ नेता झलनाथ खनालले प्रधानमन्त्री ओली भष्मासुर, प्रतिगामी भएको संज्ञा दिए । उनले ओली ठग भएको आरोप लगाए । खनालले भने,‘ झापा सङ्घर्षका नेता मानिन्थे, तर ठग रहेछन् ।’ ओलीका दिन अव धेरै नभएको उनले बताए । जनताको आशा र अपेक्षामाथि कुठाराघात गर्ने ओलीलाई अव ठिक लगाइने खनालले बताए । उनले ओलीलाई सडकमा आएर हेर्न आग्रह पनि गरे । खनालले भने,‘ टिभीबाट भुक्न छाडेर, सडकमा आएर हेर्नुस् ।’
प्रदेश १ इन्चार्ज भीम आचार्य, स्थायी कमिटी सदस्य योगेश भट्टराई लगायतका नेताहरूले प्रधानमन्त्री ओलीले प्रतिनिधिसभा विघटन गरेर देशमा द्वन्द्व निम्त्याउन खोजेको आरोप लगाए । प्रधानमन्त्री ओलीको प्रतिनिधिसभा विघटन गर्ने निर्णय विरुद्ध सबै एक जुट हुन नेताहरूको आग्रह छ ।
