_1725945816.gif)
इनरुवा : नगर विकास कोष र इनरुवा नगरपालिकाबिच 'इनरुवा सपिङ कम्प्लेक्स' आयोजना निर्माणका लागि ऋण सम्झौता भएको छ ।
आइतबार कोषका कार्यकारी निर्देशक कृष्णप्रसाद सापकोटा र इनरुवा नगरपालिकाका नगर प्रमुख राजन मेहताबिच १९ करोड ४५ लाख २६ हजारको ऋण सम्झौतामा हस्ताक्षर भएको हो । कम्प्लेक्स निर्माणको कुल अनुमानित लागत रकम २४ करोड ३१ लाख ५८ हजार रहेकोमा ८० प्रतिशत ऋण रकम कोषको तर्फबाट र २० प्रतिशत रकम नगरपालिकाबाट व्यहोरिने सहमति भएको छ ।
इनरुवा नगरपालिका वडा नंं १ मा करिब ५ कठ्ठा १८ धुर क्षेत्रफलमा सो भवन निर्माण हुन लागेको हो । सपिङ कम्प्लेक्स निर्माणलाई नगरपालिकाको महत्त्वपूर्ण व्यावसायिक आयोजनाको रूपमा हेरिएको छ ।
सम्झौता पत्रमा हस्ताक्षर गर्दै इनरुवा नगरपालिकाका नगर प्रमुख मेहताले नगरवासीलाई व्यवस्थित र आधुनिक सहरी सेवा सुविधा प्रवाह गर्न यस आयोजनामा नगर विकास कोषको ऋण महत्त्वपूर्ण हुने बताए । साथै उनले आयोजना गुणस्तरीय रूपमा समयमा नै सम्पन्न गर्नेतर्फ प्रतिबद्धता समेत व्यक्त गरे ।
कोषका कार्यकारी निर्देशक सापकोटाले आयोजना ऋण सम्झौताको चरणसम्म आई पुग्दा आयोजनालाई गुणस्तरीय बनाउन तयारी तथा विकासको चरणदेखि नै आफूहरूको नगरपालिकासँग सहकार्य भएको बताए । आयोजनालाई गुणस्तरीय रूपमा सम्पन्न गर्नेतर्फ नगरपालिकाको महत्त्वपूर्ण भूमिका रहने विचार व्यक्त गरे । यस आयोजनाबाट व्यवस्थित व्यवसायीक क्रियाकलाप, स्थानीय उत्पादनको प्रवर्द्धन र बजारीकरणकामा समेत महत्त्वपूर्ण योगदान हुने विश्वास व्यक्त गरे ।
