धरान  धरान-१७ स्थित सर्दु खोला किनार आसपासका क्षेत्रमा करिब दुई महिनादेखि अनधिकृत रूपमा सार्वजनिक जग्गा अतिक्रमण गरी घर टहरा बनाउने कार्य नरोकिएपछि यसलाई हटाउनका लागि सम्बन्धित निकायले तयारी थालेको छ ।  
आइतबार नगर प्रमुख तिलक राईको अध्यक्षता तथा प्रमुख जिल्ला अधिकारी इन्द्रदेव यादवको उपस्थितिमा बसेको सर्वपक्षीय बैठकले २०७२ साल पछि सार्वजनिक जग्गा अतिक्रमण गरी बसेका बस्तीहरू क्रमबद्ध रूपमा हटाउने निर्णय गरेको हो । 
उक्त कार्यको सुरुवात वडा नं. १७ को नयाँ अतिक्रमित क्षेत्रबाट गर्ने निर्णय गरेको छ । धरान उपमहानगरपालिका वडा नं. १७ देविथान र कालापानी लगायत विभिन्न खोलाहरूको किनारा, बगर र बहाव क्षेत्र अतिक्रमण गरी रातारात बस्ती बस्ने क्रम नरोकिएको बढ्दै गएको हुँदा खुल्ला क्षेत्र र सार्वजनिक जग्गाको संरक्षणमा अवरोध पुगेको, नगरको सुन्दरता कुरूप बन्दै गएकोले जिल्ला तथा धरानका सबै राजनीतिक दलहरूले बाधा अवरोधहरूको सामूहिक प्रतिवाद एवं व्यवस्थापन गर्ने प्रतिबद्धता व्यक्त गरेको छ । 
बैठकले जिल्ला प्रशासन कार्यालय, सुरक्षा निकायहरू र राजनीतिक दलहरूको सक्रिय सहभागिता एवं संलग्नता र समन्वयमा सम्पन्न गर्ने समेत निर्णय गरेको हो ।