धरान : अनलाइन फारम भरेका ७ जना विद्यार्थीले परीक्षा दिन नपाएपछि पूर्वाञ्चल इन्जीनियरीङ क्याम्पस धरानमा आन्दोलन भएको छ । अनलाइन मार्फत फारम भरेर परीक्षा दिने तयारीमा रहेका विद्यार्थीले प्रवेश पत्र नपाएपछि आन्दोलन भएको हो। 

इन्जीनियरीङ अध्ययन संस्थान (आइओइ) ले परीक्षा फारम रजिस्टर नभएको कारण प्रवेश पत्र नपाएको बताएपछि विद्यार्थीको परीक्षा अन्योलमा परेको हो । आइओइको केन्द्रीय कार्यालय सम्म पुगेर ध्यान आकर्षण गराउँदा समेत माग सुनुवाइ नभएपछि बिहीबारबाट क्याम्पस अगाडी आगजनी र प्रदर्शन गरेका हुन् । 
मेकानिकल पहिलो वर्षका विद्यार्थी तेज बहादुर खत्रीका अनुसार यो वर्ष परीक्षा दिन नपाएका विद्यार्थीले आगामी वर्ष परीक्षा दिन पाउने कुनै ग्यारेन्टी छैन । आइओईले अर्को वर्ष सिट खाली भए मात्र परीक्षा दिन पाउने भनेपछि उनीहरू समस्यामा परेका हुन् । 
क्याम्पसले फारम स्वीकार भए नभएको विद्यार्थीको सूचना समेत प्रकाशित नगरेको भन्दै विद्यार्थी आक्रोशित भएका हुन् । आईओइले लापरबाही गरेर विद्यार्थीको भविष्यमा खेलबाड गरेको आन्दोलनरत विद्यार्थी प्रभास गौतमले बताए । यस पटक नै जरिवाना लिएर पनि विद्यार्थीले थप परीक्षा दिन पाउनुपर्ने उनको भनाई छ । 
उता क्याम्पस प्रमुख ओम प्रकाश ढकाल अनलाइन बाट फारम भरेका विद्यार्थीले परीक्षा दिन नपाउनु समस्या भएको बताए । अनलाइनका प्राविधिक कारणले यो समस्या देखिएको उनले बताए । आफूले समस्याका विषयमा डिन कार्यालयमा जानकारी गराएको र सकारात्मक प्रतिक्रिया पाएकाले विद्यार्थीको माग सुनुवाइ हुनसक्ने उनले प्रस्ट पारे।  
engineering-campus-andalon-