इटहरी : अखिल नेपाल फुटबल संघ (एन्फा)को सुनसरी अध्यक्षमा कोविदजंग कार्कीले उम्मेदवार बन्ने भएका छन् । वैशाख ८ गते हुने अधिवेशनमा उनले उम्मेदवारी दिने भएका हुन् । 
एन्फा टेक्निकल सेन्टर धरानमा हुन लागेको अधिवेशनले सुनसरी जिल्ला कार्यसमिति चयन गर्ने भएको छ । हालका जिल्ला कोषाध्यक्ष समेत रहेका कार्की फुटबलका लगनशील सारथि हुन् । २०६४ साल देखी एन्फा सुनसरीमा आबद्ध भएका उनी फुटबलका वडा स्तरदेखीका सम्पूर्ण गतिविधिमा सक्रिय हुँदै आएका छन् । 
दुई कार्यकाल सदस्य र पछिल्लो कार्यकाल कोषाध्यक्ष भएका कार्कीले सुनसरीमा फुटबलको धरातल झनै बलियो बनाउन लागिपर्ने बताए । यसअघिको कार्यसमितिले गरेका सकारात्मक कार्यको निरन्तरताका साथ थप रचनात्मक क्रियाकलापमा ध्यान दिने उनले सुनाए । खेलाडी उत्पादन गर्न स्कुल र वडा देखी नै प्रतियोगिता आयोजना गर्ने योजना उनले अगाडी सारेका छन्। 
खेलाडीको सुरक्षा र फुटबललाई आन्तरिक आम्दानीको श्रोत बनाउन लागिपर्ने उनको भनाई छ। नेपाली काँग्रेस इटहरी उपमहानगरपालिकाका उपसभापति समेत रहेका उनी स्थानीय तह तथा क्लबहरू सँग समन्वय गरेर खेलकुदको विकाशमा ध्यान दिने उनको योजना छ। खेलकुद पर्यटनको प्रमुख आधार भएको बताउँदै उनले धरान, इटहरी, दुहबी र इनरुवाका रङ्गशाला मार्फत फुटबलको प्रवर्द्धन र विकाशमा आफू लागिपर्ने उनको भनाई छ।