चतरा : वराहक्षेत्र नगरपालिका वडा नं ६ स्थित ठाकुरवारिदेखि कोसीपारिको श्रीलङ्का टप्पु जोड्न सप्तकोसी नदिमा झोलुङ्गे पुलको निर्माण प्रक्रिया अगाडि बढेको छ।
ठुला झोलुङ्गे पुल निर्माण विभागले पुल निर्माणको अध्ययन सुरु गरेको हो। नमुना झोलुङ्गे पुल नामकरण गरेको उक्त योजनाकालागि आर्थिक वर्ष २०७९/०८० मा प्रदेश नं १ सरकारले ४ करोड बजेट विनियोजन समेत गरेको छ।  
सुगम जिल्लाको दुर्गम बस्तीको रूपमा चिनिएको श्रीलङ्का टप्पुसँगै उदयपुर जिल्लासँग सुनसरीलाई जोड्ने महत्त्वपूर्ण योजनाको रूपमा लिएको झोलुङ्गे पुलको डिपीआरको काम सोमवारबाट सुरु गरिएको वराहक्षेत्र नगरपालिकाका प्रमुख रमेश कार्कीले बताए ।
उक्त झोलुङ्गे पुल निर्माणले स्थानीयको दैनिकी, आधारभूत आवश्यकता, कृषि, पर्यटनको महत्त्वपूर्ण विकास हुने वराहक्षेत्र वडा नं ६ का अध्यक्ष उद्भवप्रसाद पोख्रेलले बताए। 
ठुला झोलुङ्गे पुल निर्माण विभागले अन्तर्गत नै वराहक्षेत्र-८ को शेरेचोक देखि वडा नं ३ जोड्ने नहरमा मोटरेवल पुल, वडा नं ७ बाङ्गे (प्रगति चौक) देखि वडा नं ३ तिम्सिना टोल जोड्ने नहरमा मोटरेवल पुल निर्माणको प्रक्रिया समेत अगाडि बढेको छ।