इटहरी : मोरङको बुढीगंगा गाउँपालिका स्थिति रहेको मनमोहन प्राविधिक विश्वविद्यालयमा तालाबन्दी भएको छ । सोमबार विश्वविद्यालयमा कार्यरत कर्मचारी तथा शिक्षकहरूको सङ्गठनले उपकुलपति, सेवा आयोगका अध्यक्ष, रजिष्ट्रार र प्राचार्यको कार्यकक्षमा तालाबन्दी गरेको हो । 
विश्वविद्यालयमा कार्यरत कर्मचारी तथा शिक्षकहरू विगत केही समयदेखि विभिन्न माग राख्दै आन्दोलनरत छन् । व्यवस्थापन र आन्दोलनरत पक्षबिच पटक पटक छलफल भई माग पूरा गर्ने सहमति कार्यान्वयन नभएको भन्दै तालाबन्दी गरेका हुन् ।
मनमोहन प्राविधिक विश्वविद्यालय प्राध्यापक सङ्घ र कर्मचारी सङ्घले संयुक्त रूपमा शिक्षक र कर्मचारीहरूको  उपकुलपतिलाई १८ बुँदे माग सहितको पत्र बुझाएका थिए ।
छलफल र परामर्श विपरीत शिक्षक, कर्मचारी लगायत प्राविधिकहरूको नियुक्ति तथा बढुवा सम्बन्धी कार्यविधि २०७९पारित भएको भन्दै उनीहरूले आन्दोलन चर्काएका हुन् ।
स्थायी शिक्षक तथा कर्मचारीको बढुवा र करार कर्मचारीलाई स्थायी गरी सूचना प्रकाशित गर्ने सर्त कार्यान्वयन नभएको उनीहरूको भनाइ छ । 
विज्ञप्ति जारी गर्दै आन्दोलनरत पक्षले आफूहरूको माग सुनुवाइ नगरे झनै कडा आन्दोलनको चेतावनी दिएका छन् ।
विश्वविद्यालय नेपाल सरकार, भारत सरकार र मनमोहन स्मृति प्रतिष्ठानको त्रिपक्षीय सम्झौता भई २०६५ सालदेखि सञ्चालनमा आएको हो ।