धरान : आमा चन्द्र कुमारी प्रधान स्मृति प्रतिष्ठान धरानले छात्रवृत्ति वितरण, सहयोग, पुरस्कार र सम्मान कार्यक्रम सम्पन्न गरेको छ। 
धरान-१ निवासी महेश प्रधान र अन्जु प्रधानले आमा बाबुको स्मृतिमा स्थापना गरेको प्रतिष्ठानले मङ्गलवार सिद्धि नेवा: परिषद्को सभाहलमा उक्त कार्यक्रम सम्पन्न गरेको हो। 
प्रतिष्ठानले पब्लिक हाइस्कूल धरान-१२ र कक्षा-११ मा अध्ययनरत छात्र सुजन सिवा र छात्रा कृएता श्रेष्ठ तथा ज्ञानोदय मावि धरान-११ का छात्र माइकल राई र छात्रा अर्पिता श्रेष्ठलाई जनही रु.५५००/- का दरले छात्रवृत्ति प्रदान गरेको छ ।
त्यस्तै धरान-१ स्थित श्री सरस्वती आधारभूत विद्यालयलाई १ थान साउन्ड सिस्टम र ङाग्पूर डोल्मा छ्योलिङ गुम्बालाई भवन निर्माण गर्न रु.१५५०० कार्पेट प्रदान समेत प्रदान गरेको छ।
कार्यक्रममा सञ्चारकर्मी विनय प्रधानलाई रु.५५००/- सहित टंक बहादुर प्रधान पत्रकारिता पुरस्कारले पुरस्कृत गरिएको थियो। प्रतिष्ठानले धरानको स्वास्थ्य र सामाजिक क्षेत्रमा योगदान गर्नुहुने प्रा.डा. विक्रम प्रसाद श्रेष्ठलाई विशेष सम्मान गरेको थियो। 
प्रमुख अतिथि महेन्द्र बहुमुखी क्याम्पस धरानका पूर्व क्याम्पस प्रमुख तथा पूर्व प्रशासक कुमार बहादुर कार्कीले आफ्नी आमाको स्मृतिका छोरा बुहारीले गरेको पुण्य कार्यको मुक्त कण्ठले प्रशंसा गरे। साथै उनले नेपाल आमाको संरक्षणका निम्ति पनि नेपालीहरू वेलैमा जाग्नु र लाग्नु पर्ने समय आएको कार्कीले बताए।  
अतिथिहरूमा सिद्ध नेवा: परिषद्का अध्यक्ष गोकुल प्रसाद श्रेष्ठ, सरस्वती आधारभूत विद्यालय व्यवस्थापन समितिका अध्यक्ष श्याम कुमार श्रेष्ठ र ङाग्पूर डोल्मा छ्योलिङ गुम्बाका अध्यक्ष तेन्जिन डोल्मा रहेका थिए। 
आमा बाबुको नाममा समाजका लागि गरेको यस किसिमको सहयोग सबैले उदाहरणको रूपमा लिनुपर्ने अतिथि एवं सहभागीहरूको धारणा व्यक्त गरेका थिए।