धरान : धरान उपमहानगरपालिका वाड नं १५ श्रुतिमार्ग टोलबिकास संस्थाको आयोजनामा शनिवार सरसफाइ र डेंगु रोग नियन्त्रण सचेतना कार्यक्रम सम्पन्न भएको छ।
लामखुट्टेको टोकाइबाट सर्ने डेंगु रोगको महामारी फैलिरहेकोले टोल वरिपरि सरसफाइ गर्ने खुल्ला भाडामा पानी नराख्ने घर वरिपरि पानी जम्न नदिने जनचेतना मूलक जानकारी गराउँदै नजिकिँदै गरेको चाड दशैलाई मध्यनजर गर्दै सरसफाइ कार्यक्रम गरेका थिए।
उक्त कार्यक्रममा टोलवासीहरूलाई जानकारी दिँदै श्रुतीमार्ग टोल विकास संस्थाका अध्यक्ष डाकमान राईले नगर र वडा कार्यालयको निर्देशन अनुसार टोल र आफ्नो घर वरिपरि सफा राख्ने, पानी जम्न नदिने, भोला खैनी चकलेट चाउचाउको खोलहरू प्लास्टिकहरू जथाभाबी नफाल्ने तथा आफ्नो टोल सफा राख्नु हरेक टोलवासीको जिम्मेवारी भएको बताउँदै टोलबिकास संस्था राज्यको मेरुदण्ड भएको बताए । उनले टोलबिकास संस्थाका सदस्य सबै टोलवासी हुने भएको कुरा जानकारी गराए।  उक्त टोलका महिला लघु उद्यमी ढाका समूहका अध्यक्ष प्रेमकुमारी राईले महिलाहरूले प्रयोग गर्ने प्याड र नानीहरूले प्रयोग गर्ने पेम्पस जस्ता कपडाहरू प्रयोग गरिसकेपछि व्यवस्थित गर्न अनुरोध गरे।
सरसफाइ तथा डेंगु नियन्त्रण सचेतना कार्यक्रममा श्रुत्रीमार्ग टोलबिकास संस्था, महिला उद्यमी ढाका समूह, महिला समूह, बाल समूह विभिन्न राजनीति दल र टोलवासीहरूको सहभागिता रहेको थियो। सडक वरिपरि रहेको झार निर्मूल पार्न औषधि छर्ने कार्य पनि भएको थियो।
shruti-sarasafai-2