सुनसरी : बहुविवाहको आरोप लागेका धरानका शिक्षा व्यवसायी लेखीराज सुब्बा प्रहरीको फरार सुचीमा रहेका छन् ।
धरानमा रहेको सुनसरी टेक्निकल कलेज र धरान आदर्श स्कुलका सञ्चालक समेत रहेका सुब्बा विरुद्ध गत साउन १५ गते उनकै श्रीमती सुनिता लिम्बुले बहुविवाह गरेको आरोप लगाउँदै प्रहरीमा जाहेरी दिएकी थिइन । सुनसरी टेक्निकल कलेज सञ्चालक रहेका सुब्बा दुई महिना यता फरार रहेको प्रहरीले जानकारी दिएको छ।
उनी फरार भएसँगै इलाका प्रहरी कार्यालय धरान, जिल्ला प्रहरी कार्यालय सुनसरीको टोलीले खोजी गरिरहेको इलाका प्रहरी कार्यालय धरानका प्रहरी नायब उपरीक्षक बुद्ध श्रेष्ठले जानकारी दिए । सुब्बालाई उनकै कार्यालयमा कार्यरत एक महिला कर्मचारी भगाएर विवाह गरेको आरोप छ ।
बहुविवाहको अभियोगमा जाहेरी दर्ता भएर पक्राउ पुर्जी जारी भएपछि उनी फरार रहेको प्रहरीले बताएको छ। प्रहरी नायव उपरीक्षक श्रेष्ठका अनुसार दुई महिना अघि जाहेरी परे पनि पक्राउ गर्न नसकिएको बताए ।
उनले सादा पोसाकमा प्रहरी खटाएर तथा आफैँ पनि पटक पटक कार्यरत कार्यालयमा खोजीका लागि गएको बताए । उनले बहुविवाह गरेको आरोप पत्र मात्रै भएको भन्दै कुनै प्रमाण नभएको बताए । ‘हामीले नियममा रहेर काम गर्नु पर्छ, कसैलाई आरोप लगाउँदैमा पुष्टि हुँदैन, तर हामी उहाँलाई खोज्दैछौं,’प्रहरी नायब उपरीक्षक श्रेष्ठले भने ।
प्रदेश, जिल्ला र इलाका तहले समन्वय गरेर उनको खोजी प्रहरीले जनाएको छ ।