सुनसरी : सुनसरीको देवानगञ्ज गाउँपालिकामा भएको सवारी दुर्घटनामा परी एक जनाको मृत्यु भएको छ। गए राती ११ः३० बजे गाउँपालिका वडा नम्बर एक स्थित भित्री सडकमा मोटरसाइकल अनियन्त्रित भई दुर्घटना हुँदा सोही ठाउँका ३५ वर्षीय रामचन्द्र दासको मृत्यु भएको हो।
पूर्वबाट पश्चिमतर्फ गइरहेको मोटरसाइकल आफैँ अनियन्त्रित भएको थियो । उक्त मोटरसाइकलमा पछाडि सवार दास गम्भीर घाइते भएका थिए । उनलाई उपचारका लागि विराटनगरको गोल्डेन अस्पताल भर्ना गरिएको थियो । उनको उपचारको क्रममा आज (मंगलबार) बिहान ५ बजे मृत्यु भएको प्रदेश १ ट्राफिक प्रहरी कार्यालय इटहरीले जानकारी दिएको छ।
मोटरसाइकल चालक सोही ठाउँका २७ वर्षीय अनन्दी दास सामान्य घाइते भएका छन् । उनी मोरङ प्रहरीको नियन्त्रणमा छन् । दुर्घटना पछि उक्त मोटरसाइकल कहाँ पुग्यो भन्ने समेत फेला पार्न प्रहरीले सकेको छैन ।
कोही व्यक्तिले चोरी गरेको हुन सक्ने प्रहरीले आशङ्का गरेको छ। अहिले मोटरसाइकलको खोजी भईरहको प्रहरीले बताएको छ।