_1749430366.gif)
धरान : नेपाल सरकार, गृह मन्त्रालयको राष्ट्रिय परिचयपत्र तथा पञ्जीकरण विभागले जारी गरेको एक परिपत्र अहिले सामाजिक सञ्जालमा भाइरल भएको छ ।
उक्त सूचना अनुसार विवाह नभई जन्मेको, बाबुको पहिचान नखुलेको बच्चा सहित विवाह गरेर पति सँगै बसेकी भए उक्त बच्चाको मावालीकै (आमाकै) थर राखी जन्म दर्ता गर्न पाउने व्यवस्था गरिएको छ ।
मुलुक सबै स्थानिय पञ्जिकाधिकारीलाई लेखिएको निर्देशनात्मक पत्र सबै जिल्ला प्रशासन कार्यालय र इलाका प्रशासनलाई जानकारीका लागि बोधार्थ दिइएको छ ।
पत्रमा लेखिएको छ ‘विवाह अघि जन्म भएको तर पितृत्वको ठेगान नभएको बच्चा भएको एकल आमाले विवाह गरी बच्चा सहित पतिको ठेगानामा सँगै बसेको भए उक्त बच्चाको मावलीकै थर राखी आमाको हालको स्थायी ठेगानामा जन्म दर्ता गरिदिने ।’
‘विवाह अघि जन्म भएको तर पितृत्वको ठेगान नभएको बच्चा भएको एकल महिलाले विवाह गरी पतिसँगै बसेको तर उक्त बच्चा मावलीमै बसेको भए मावलीकै थर कायम गरी मावलीकै ठेगानामा आमालाई सूचक राखी जन्म दर्ता गरिदिने’ पत्रमा निर्देशन दिइएको छ ।
बाबुको ठेगान लागेको अवस्थामा त्यस्तो दर्ता रद्द गरेर नयाँ दर्ता गरिदिने पनि पत्रमा उल्लेख छ । एकल महिलाबाट जन्मेको र पितृत्वको ठेगान नभएको बच्चाको जन्म दर्ता गर्ने विषयमा थप प्रष्ट पार्न स्थानिय तहहरूबाट माग हुँदै आएकोले दोहोरो दर्ता नहुने गरी नयाँ व्यवस्था गरिएको पत्रमा उल्लेख छ ।
