इटहरी : नेपाली काँग्रेसको मजदुर सङ्गठन नेपाल ट्रेड युनियन काँग्रेसको उपाध्यक्षमा इटहरीका ज्योति कोइराला निर्वाचित भएका छन् ।

बुधवार भएको निर्वाचनको अन्तिम मतपरिणाम अनुसार कोइराला उपाध्यक्षमा निर्वाचित भएका हुन् । संस्थापन इतर समूहका कोइराला काँग्रेस महाधिवेशन प्रतिनिधि हुन् ।
जनता बहुमुखी क्याम्पस सञ्चालन समिति सदस्य कोइराला जनता माध्यमिक विद्यालयका शिक्षक समेत हुन् । कोइराला महेन्द्र यादव प्यानलबाट खुल्ला उपाध्यक्षको उम्मेदवार भएका थिए ।
अध्यक्षमा यादव पराजित हुँदा संस्थापन पक्षका योगेन्द्र कुँवर निर्वाचित भएका छन् । कुँवरले ४४१ मत पाए भने यादवले ३७६ मत पाए । अध्यक्षमा बाहेक अन्य पदमा शेखर-गगन पक्षका उम्मेदवार विजयी भएका छन् ।
बिहीबार सम्पन्न मतगणना अनुसार वरिष्ठ उपाध्यक्षमा तेजेन्द्र जङ्ग कार्की, खुला उपाध्यक्षमा कोइराला र गणेशबहादुर केसी र महासचिवमा अजय कुमार राई निर्वाचित भए । महिला उपाध्यक्षमा राधिका कुइँकेल खनाल, सेवा क्षेत्रतर्फको उपाध्यक्षमा नेत्रविक्रम थापा, उत्पादन क्षेत्रतर्फको उपाध्यक्षमा ललितबहादुर श्रेष्ठ, अनौपचारिक तथा स्वरोजगार क्षेत्रको उपाध्यक्षमा राजेश पालिखे निर्वाचित भएका छन् ।
खुलातर्फको उपमहासचिवमा जनार्दन भट्टराई र बलदेव तामाङ, महिला उपमहासचिवमा सुशीला घिमिरे निर्वाचित भएका छन् । सेवा क्षेत्रतर्फको उपमहासचिवमा देवदत्त बडू, उत्पादन क्षेत्रको उपमहासचिवमा कुलबहादुर खड्का, अनौपचारिक तथा स्वरोजगार क्षेत्रको उपमहासचिवमा रुकमणी थापा अर्चना निर्वाचित भएका छन् । सञ्जयकुमार दाहाल कोषाध्यक्षमा र सह-कोषाध्यक्षमा रसामाया गुरुङ निर्वाचित भए ।
सदस्यतर्फको मतगणना जारी छ ।