धरान : प्रतिबन्धित लागुऔषध ब्राउन सुगर र गाँजा सहित प्रहरीले बिहीबार झापा र उदयपुरबाट ५ जना युवालाई पक्राउ गरेको कोशी प्रदेश प्रहरी कार्यालय विराटनगरले जनाएको छ। 
इलाका प्रहरी कार्यालय दमकको प्रहरी टोलीले दमक नगरपालिका-७ पशुहाटबाट शङ्कास्पद रहेको को १ ह ९७४५ नम्बरको अटोको चेकजाँच गर्दा चालक  दमक-१ का ३५ वर्षी प्रकाश श्रेष्ठ, अटोमा सवार २३ वर्षीय अर्जुन लिम्बु र उनकी श्रीमती २७ वर्षीय मनीषा लिम्बूलाई ५१ ग्राम ब्राउनसुगर सहित पक्राउ गरेको हो। 
उनीहरूको खानतलासी गर्दा अटोको डिक्कीमा ब्राउनसुगर फेला परेको बताइएको छ ।
यसैगरी उदयपुरको उदयपुरगढी गाउँपालिका-७ हाडेबासमा जिल्ला प्रहरी कार्यालय उदयपुरको प्रहरी टोलीले चेकजाँच गर्दा रौतामाई गाउँपालिका-४ मालवासेका ५५ वर्षीय मोटे रोका र २३ वर्षीय नेत्र परियारलाई १६ केजी ३३० ग्राम गाँजा सहित पक्राउ गरेको छ ।