झापा : बिर्तामोडको ग्यारेजमा आगलागी हुँदा तीन वटा बसमा क्षति भएको छ आज बिहान १०:३० बजे बिर्तामोड-५ स्थित पश्चिम बसस्टेण्ड नजिक रहेको ग्यारेजमा निदि क्याम्पसको मे-१-ख-३३४५ नम्बरको बसमा मर्मत गर्ने क्रममा अचानक विद्युत् सर्ट भई आगलागी भएको हो । आगलागीबाट स्कुल बस पूर्ण रूपमा जलेर नष्ट भएको छ ।

त्यस्तै सोही ग्यारेजमा बनाउन ल्याएको मे-१-ख-२२१५ नम्बरको मातृ भाग्यरेखा बसको अगाडीको भाग जलेर क्षति भएको छ । त्यस्तै प्र१-०१-००१ख४१२६ नम्बरको बसको पेन्टिङ जलेको छ । तीन वटा गाडी जल्दा अन्दाजी २१ लाख बराबरको क्षति भएको प्रहरीले जनाएको छ । बसमा लागेको आगो बिर्तामोड नगरपालिकाको दमकल, नेपाल प्रहरी र स्थानीयको सहयोगमा नियन्त्रणमा लिइएको थियो ।