_1735354691.gif)
धरान : पहिलो पटक चलिरहेको रात्रिकालीन २५औँ गोधुली रनिङ कपको फाइनल खेलमा आज बिहीबार साँझ धरान १५ र धरान १४ रङ्गशालामा भिड्दै छन् ।
दुवै टिम धरान १५ र १४ ले उपाधि चुम्ने आज बिहान आयोजित पत्रकार सम्मेलनमा दाबी गरे । धरान १४ का कोच शिव राईले वडा १५ राम्रो टिम भए पनि आफूहरू उपाधि जित्ने लक्ष्यका साथ मैदानमा उत्रने बताए ।
उनले आफ्नो टिममा डिफेन्स र मिडफिल्ड बलियो पक्ष रहेकोले विपक्षी टिमले गोलपोष्टमा प्रहार गर्ने मौका नपाउने दाबी गरे । उनले भने ‘धरान १४ सुपर ८ जितेको वडा समेत रहेकोले उपाधि उचाल्ने पक्का पक्की छ ।’
दोस्रो सेमिफाइनलमा धरान १७ सँग पेनाल्टी तनावपूर्ण बनेपछि विवादका बिच धरान १४ फाइनलमा पुगेको हो ।
पत्रकार सम्मेलनमा धरान १५ का मेनेजर जुदास राईले गत: २४औँ संस्करणमा कारबाहीमा परेर खेल्न नपाएपनि यसपालि फाइनलमा उपाधि उचाल्नकै लागि पुगेको बताए ।
उनले भने ‘वडा १५ ले दर्शक र समर्थकहरूलाई उपाधि उचालेर गत वर्ष प्रतिबन्ध लागेको जवाफ दिनेछ ।’ रात्रिकालीन खेलमा आउने हजारौँ समर्थकहरू १२औँ खेलाडी भएको र उनीहरूबाट मिल्ने सपोर्टले पनि धरान १५ को जीत सुनिश्चित रहेको उनको भनाई छ ।
टिम क्याप्टेन आशुतोष राईले प्रतियोगिता सुरु हुनु एक महिना अघिदेखि प्रशिक्षण लिएको बताउँदै शतप्रतिशत उपाधि जित्ने दाबी गरे ।
उनका अनुसार रात्रिकालीन खेलमा एयरवलमा मात्र फ्लडलाइटले केही समस्या हुने गरेको भए पनि समग्रमा रात्रिकालीन प्रतियोगिताले खेलाडीहरूमा उत्साहित बढाएको छ ।
आजको फाइनलमा दुवै वडाबाट समर्थकहरूको साथ पाउने र त्यसले फाइनल जिताउन ठुलो भूमिका खेल्ने अपेक्षा दुवै टिमले गरेको छ । यद्यपि दुवै वडाको टिम बलियो वडालाई पराजित गर्दै फाइनल पुगेकोले खेल निकै प्रतिस्पर्धापूर्ण र रोमाञ्चक हुने सम्भावना छ ।
प्रतियोगिताको विजेताले १ लाख ५० हजार र उप विजेताले ७५ हजार नगद पुरस्कार प्राप्त गर्नेछन् भने प्रतियोगिताको क्वाटर फाइनलमा पुगेको टिमले स्व. सुवास राई स्मृति सुपर ८ प्रतियोगितामा सहभागी हुने अवसर प्राप्त गर्ने आयोजक गोधुली क्लबका उपाध्यक्ष सतिस केसीले जानकारी दिए ।
गोधुली कपको आज राती हुने समापन समारोहमा चर्चित गायिका तृष्णा गुरुङ आउने भएकी छन् । उनको प्रस्तुतिले दर्शकहरूलाई मनोरञ्जन दिँदै समापन समारोहलाई भव्य बनाउने आयोजकले गरेको छ ।
_1664681437.jpg)
