धरान : इलाका प्रहरी कार्यालय धरानले धरान-१७ का २८ वर्षीय बेगराज लिम्बू र ३४ वर्षीय सागर राईलाई ३ ग्राम १३ मिलिग्राम लागुऔषध ब्राउनसुगर सहित बुधवार पक्राउ गरेको छ ।

कोशी प्रदेश प्रहरी कार्यालय विराटनगरले जनाए अनुसार इटहरी-१६ का ३४ वर्षीय मनोजकुमार चौधरीलाई २७ ग्राम २७ मिलिग्राम ब्राउनसुगर सहित पक्राउ गरिएको छ ।

इटहरी-६ का २३ वर्षीय सनम तामाङलाई २६ ग्राम ब्राउनसुगर र इटहरी-२ का २७ वर्षीय निरज लिम्बू र २२ वर्षीय सन्दिप मगरलाई ३ ग्राम ५६ मिलिग्राम ब्राउनसुगर सहित पक्राउ गरिएको छ ।

उनीहरूलाई कोशी गापा-१ बाट लागुऔषध नियन्त्रण ब्यूरो विराटनगर र इलाका प्रहरी कार्यालय लौकहीको प्रहरी टोलीले पक्राउ गरेको हो ।

यसैगरी रामधुनी-९ का १६ वर्षीय आदित्या चौधरीलाई २ ग्राम १ मिलिग्राम ब्राउनसुगर सहित पक्राउ गरिएको छ । रामधुनीकै २६ वर्षीय मनिष चौधरीलाई २ ग्राम ५६ मिलिग्राम ब्राउनसुगर सहित पक्राउ परेका छन् । रामधुनी-५ का २६ वर्षीय बिज्ञान साहलाई ३५ ग्राम ८८ मिलिग्राम ब्राउनसुगर सहित  पक्राउ गरिएको छ ।

सुनसरीको हरिनगर-१ बाट २० वर्षीय प्रकाशकुमार दाश र २२ वर्षीय रितेशकुमार मण्डललाई प्रतिबन्धित लागुऔषधी नाईट्राजेपाम १२० ट्याब्लेट सहित पक्राउ गरिएको छ । उनीहरूलाई प्रहरी चौकी भुटाहाको प्रहरी टोलीले पक्राउ गरेको हो ।