झापा : झापा र इलामको सिमानामा बुधवार अपराह्न हत्या गरिएका दमकस्थित बेलडाँगी भुटानी शरणार्थी शिविरमा बसोबास गर्दै आएका एलबी गुरुङ नामले चिनिने ४६ वर्षीय लालबहादुर गुरुङको हत्यारालाई प्रहरीले पक्राउ गरी सार्वजनिक गरेको छ। 
झापा र इलामको सीमा नजिक पर्ने रतुवा खोलाको पुलमा गुरुङमाथि खुकुरी प्रहार भएको थियो । गुरुङ आपराधिक पृष्ठभूमिको रहेको र एक व्यक्तिको रकम लुटेपछि त्यसको बदलामा स्थानीय युवाहरू मिलेर खुकुरी प्रहार तथा कुटपिट गर्दा गुरुङको उपचारको क्रममा बिर्तामोडमा ज्यान गएको जिल्ला प्रहरी कार्यालय इलामले जनाएको छ । 
इलामका प्रहरी प्रमुख प्रहरी उपरीक्षक दिलीप घिमिरेका अनुसार घटनामा संलग्न ९ जनालाई जिल्ला प्रहरी कार्यालय इलामले पक्राउ गरी आज सार्वजनिक गरेको हो ।
पक्राउ पर्नेमा चुलाचुली गाउँपालिका इलामका नरेन्द्र दर्जी, नरेश कुमार याखा, अभिषेक केरुङ, सेसेयाङ याखा, चन्द्र कुमार यवा, डम्बर यवा, नरेन्द्र तुम्रोक, विक्रम हिङमाङ र पर्शु राई रहेको प्रहरी उपरीक्षक घिमिरेले बताए । प्रहरीका अनुसार उनीहरूले आफूहरू हत्यामा संलग्न रहेको प्रहरी समक्ष स्वीकार गरेको  घिमिरेले जानकारी दिए।