इटहरी : इटहरी चोकमा तथा सडकमा तेस्रो लिङ्गीहरूको यौन अश्लीलता रोक्न इटहरीका मेयर हेमकर्ण पौडेल सहित दर्जनौँ सर्वसाधारण सडकमा उत्रिएका छन् । सामाजिक विकृति रोक्न मेयर पौडेल सहित दर्जनौँ सर्वसाधारण सडकमा निस्किएका थिए ।
रातको समयमा तेस्रो लिङ्गीहरूले इटहरीको पश्चिम लाइनमा अश्लीलता देखाएको भन्दै इटहरीका मेयर पौडेल प्रहरी प्रशासन लिएर आफै सडकमा पुगेका थिए । पछिल्लो समय पोखरा, काठमाडौँ लगायतका सहरहरूबाट तेस्रो लिङ्गीहरू इटहरी आउने र यौन धन्दा गरेर अपराध बढेकाले नियन्त्रण गराउन लागि पर्ने मेयर पौडेलको भनाइ छ ।
तेस्रो लिङ्गीहरूले रातको समयमा अश्लीलता प्रकट गरेर सताएका थुप्रै मौखिक गुनासा आइरहेका बेला केहीलाई पक्राउ गरेर एक रात राखेको इलाका प्रहरी कार्यालय इटहरीका डिएसपी खगेन्द्र खड्काले बताए। उनीहरूलाई इटहरी छोड्न चेतावनी दिएका छौ उनले भने । रातको समयमा अवैध धन्दा सँगै चोरी र लुटपाटको घटना समेत बढेको प्रहरीको निष्कर्ष छ ।
इटहरी-९ का वडाध्यक्ष जितेन थापाले सहरमा विकृति फैल्याएको भन्दै तेस्रो लिङ्गीहरूलाई अनैतिक काम नगर्न चेतावनी दिएको बताए । अन्य सहरबाट इटहरी आएर अवैध काम गर्ने गरेको भन्दै वडाध्यक्ष थापाले इटहरीलाई सभ्य सहर बनाउनका लागि यो अभियानलाई निरन्तरता  दिने  बताए ।
नागरिक समाज इटहरीका अध्यक्ष राजु केसीले इटहरीमा बाहिरबाट तेस्रो लिङ्गीहरू आएर यौन धन्दा तथा उच्छृङ्खलता मच्चाएको भन्दै अभियानले उनीहरूको क्रियाकलाप नियन्त्रण गर्नु पर्ने बताए । फ्ल्याट नै भाडामा लिएर उनीहरू अङ्ग प्रदर्शन गरेर रातको समयमा इटहरीको बदनाम गरिरहेको उनको भनाइ थियो ।
मेयरले दिए अलपत्र परेकालाई घर सम्म पुग्ने खर्च 
मध्यरातमा खर्चको कारण इटहरी आसपासमा अलपत्र परेकाहरूलाई इटहरीका मेयर हेमकर्ण पौडेलले घर पुग्ने सम्मको व्यवस्था गरिदिएका छन् । मंगलबार राती आर्थिक अभावको कारण इटहरीको पेटीमा भेटिएका सबिन धिमाललाई एक रात इटहरीमा खान बस्न सहित घर पुग्ने व्यक्तिगत खर्च मेयर पौडेलले दिएका हुन । धिमालले आफू आर्थिक अवस्थाको कारण समस्यामा परेको बेला आफूलाई खर्च दिएको भन्दै मेयरको प्रशंसा गरे ।