_1725945816.gif)
धरान : उँधौली सँगै नेवार समुदायको य:मरी पुन्ही पनि आइतबार देखि घर घरमा सुरु भएको छ । यसलाई मौसम अनुसारको पोषणयुक्त खाना उत्सवको रूपमा पनि मनाइँदै आएको छ ।
यसपालि पनि मरी पूर्णिमाको अवसरमा धरानमा चौथो मरी उत्सव मनाइँदै छ । पासा खलःको आयोजनामा धरान-३ स्थित गल्ली टोल, शंखधर मार्गमा पुष ८, ९ र १० गतेसम्म सांस्कृतिक कार्यक्रम सहित मरी सडक उत्सव सुरु भएको हो ।
उत्सवमा सडकमै य:मरी खाएर सांस्कृतिक झाकी सहित मनाइने पासा खलका महासचिव अमृत शाक्यले बताए । उत्सव धरान उपमहानगरपालिकाका उपमेयर आईन्द्र विक्रम वेघाले उद्घाटन गरेका छन् ।
उत्सवमा नेवा: सांस्कृतिक लाखे नाच, धिमे बाजा, नयोखी बाजा, दफा भजन लगायतका सांस्कृतिक कार्यक्रम प्रस्तुतिहरू छन् ।
नेवार समुदायले हेमन्त ऋतु बखत नेपाल सम्बतको दोस्रो महिना थिंलाको पूर्णिमा पहिलो पूर्णिमा अर्थात् धान्य पूर्णिमाको दिनमा मरी पुन्ही मनाउँदै आएका छन् । उत्सवमा य:मरीका साथै नेवारी परिकार बारा, चटामरी, छोयला, कोचिला, समेबजी, वासा लगायत पनि राखिएको छ ।
