सुनसरी:बुधबार बिहान गोली हानी हत्या गरिएका सुनसरीको दुहबी नगरपालिकाका फिदा हुसेनको परिवार तथा स्थानीयबासीले माग गरेको ५ बुँदे मागलाई गृहमन्त्रालयले क्याबिनेटमा प्रस्तुत गर्ने भएको छ ।
घटनापछि आक्रोशित स्थानीय एवं परिवारजनले सुनसरीका प्रमुख जिल्ला अधिकारी प्रेमप्रकाश उप्रेती मार्फत प्रधानमन्त्रीलाई ५ बुँदे माग पठाएका थिए । प्रजिअ उप्रेतीले परिवारजन एवं स्थानीयको मागलाई गृहमन्त्रालयमा पठाएको र गृहले क्याबिनेटको लागि प्रस्ताव गरिसकेको जानकारी दिए । ‘मैले गृहमन्त्रालयमा मागहरु हिजै पठाएको थिएँ, गृहले पनि क्याबिनेटमा प्रस्ताव पठाइसकेको छ,’प्रजिअ उप्रेतीले भने,‘आजै वा भोली क्याबिनेट बसेर माग सम्बोधन हुन्छ ।’
घटनापछि आक्रोशित स्थानीयले बुधबार २४ घण्टाभित्र अपराधीलाई पक्राउ गरी कानुनी दायरामा ल्याउनुपर्ने, मृतकलाई शहीद घोषणा गर्नुपर्ने, तत्काल क्षतिपूर्ति उपलब्ध गराउनुपर्ने, मृतकको छोरालाई उनको ठाउँमा जागिर दिलाउनुपर्ने र हत्या, बलात्कारको घटना वृद्धि भइरहदा पनि सरकार मौन रहेको भन्दै गृहमन्त्रीले राजिनामा दिनुपर्ने माग गरेका थिए । एक इँटा भट्टामा सुपरभाइजर र विद्युत प्राधिकरणका कर्मचारीसमेत रहेकय हुसेनको बुधबार बिहानै मर्निङ वाकको समयमा अज्ञात समुहले गोली हानी हत्या गरेको थियो । उनको हत्यारा अहिलेसम्म पत्ता लाग्न सकेको छैन । करिब २ महिना अघि पनि सुनसरीकै भुटाहामा भारतीय सुटरहरुद्धारा गोली हानी मौलाना खुर्सिद आलमको हत्या गरिएको थियो ।
फिदा हत्या घटनाबारे १ नम्बर प्रदेश प्रहरी कार्यालय विराटनगर र जिल्ला प्रहरी कार्यालयको संयुक्त टोलीले अनुसन्धान गरिरहेको छ भने केन्द्रीय अनुसन्धान ब्युरोको टोली पनि अनुसन्धान गर्न बुधबार साँझ घटनास्थल आइपुगेको छ । ‘सबै कोणबाट अनुसन्धान भइरहेको छ, शंकाको घेरामा रहेका व्यक्तिहरुलाई ल्याएर सोधपुछ गरिरहेका छौं,’प्रजिअ उप्रेतीले भने ।
सडकमै शव राखेर शान्तिपुर्ण आन्दोलन
स्थानीयले मृतकको शव दुहबी बीच सडकमा राखेर शान्तिपुर्णरुपमा आन्दोलनमा छन् । दुहबी बजार पुर्णरुपमा बन्द छ भने यातायात पनि ठप्प छ । सरकारले ५ बुँदे माग पुरा नगरेसम्म आन्दोलन जारी रहने स्थानीयको अडान छ ।