 (13)_1727965004.gif)
धरान : इटहरीमा फोहोरबाट ग्याँस उत्पादन थालिएको छ ।
इटहरी वडा नम्बर १० मा आधुनिक फोहोर प्रशोधन केन्द्र सञ्चालनमा ल्याएर फोहोरबाट मोहोर बनाउन थालिएको हो। फोहोर प्रशोधन केन्द्रबाट ग्याँस उत्पादन थालिएको छ । प्रशोधन केन्द्रको प्रदेश नम्बर १ का पूर्व मुख्यमन्त्री भीम आर्चायले एक समारोहका बिच उद्घाटन गरे । इटहरी उपमहानगरपालिका, वैकल्पिक ऊर्जा प्रवर्धन केन्द्र र वेस्ट एन्ड इन्भाइरो म्यानेजमेन्टको त्रिपक्षीय साझेदारीमा फोहोर प्रशोधन केन्द्र सञ्चालनमा ल्याइएको हो ।
केन्द्र सञ्चालनका लागि वैकल्पिक ऊर्जा प्रवर्धन केन्द्र मार्फत विश्व बैंकको ६० प्रतिशत अनुदान र वेन्ट एन्ड इन्भाइरो म्यानेजमेन्टको ४० प्रतिशत लगानी रहेको छ । इटहरी उपमहानगरपालिकाले जग्गा,त्यहाँ सम्म पुग्ने कालोपत्रे बाटो र पर्खाल लगाउने कार्य गरेको छ ।
उपमहानगरका वातावरण शाखा प्रमुख पुष्पनारायण चौधरीका अनुसार इटहरीमा प्रत्येक दिन ५५ टन फोहोर जम्मा हुन्छ। केन्द्रको प्रत्येक दिन आठ सय केजी सम्म ग्याँस उत्पादन गर्ने क्षमता छ । सडने पोहोरबाट मात्र ग्याँस उत्पादन हुन्छ । नसड्ने फोहोरलाई रिसाइक्लिङ्ग गरेर बिक्री गरिन्छ । प्रशोधन केन्द्रको उद्घाटन गर्दै पूर्व मुख्यमन्त्री भीम आर्चायले नगरका लागि अत्यन्तै आवश्यकीय फोहोर प्रशोधन केन्द्र निर्माण भएर सञ्चालनमा आएकोमा खुसी व्यक्त गरे ।
संवृद्धिका लागि वातावरणीय स्वच्छता अनिवार्य रहेको जनाउँदै इटहरीको पोहोर मैलाको उचित व्यवस्थापन हुन थालेको भन्दै प्रशंसा गरे । प्रदेश सांसद लिलम बस्नेतले इटहरीमा चुनौतीको रूपमा रहेको फोहोर मैला व्यवस्थापनको कार्य व्यवस्थित हुनु नगरवासीका लागि खुसीको कुरा भएको बताए ।
नगरप्रमुख द्वारिकलाल चौधरीले प्रशोधन केन्द्रका कारण वडा नम्बर १० को विकासमा टेवा पुगेको बताए । गुणस्तरीय कालोपत्रे सडक लगायत सम्झौता बमोजिमका अन्य कार्य गरिएको बताए । उपप्रमुख लक्ष्मी गौतमले पाँच वर्षे कार्यकालकै एक गौरव गर्न लायक कार्य सम्पन्न भएको बताइन् । कार्यक्रममा वडाध्यक्ष प्रकाश चौधरी, वडा सदस्य राम नारायण चौधरी, वेन्ट इन्भाइरो एन्ड म्यानेजमेन्टका प्रबन्ध निर्देशक मोहन भण्डारी,मानध्वज मोक्तान लगायतले बोलेका थिए । केन्द्र सञ्चालनमा नेपाल बङ्गलादेश बैकले वित्तीय सहयोग रहेको जनाइएको छ ।
यसैबिच आजै इटहरी उपमहानगर वडा नम्बर ७ स्थित वहुवर्षे सडकको उद्घाटन गरिएको छ ।
विभिन्न खण्डगरि करिब तीन किलोमिटर कालोपत्रे सडकको पूर्व मुख्यमन्त्री भीम आर्चायले उद्घाटन गरेका हुन् । उद्घाटन कार्यक्रममा सम्बोधन गर्दै उहाँले इटहरी उपमहानगरका प्रमुख चौधरीको नेतृत्वमा भएको विकास निर्माण कार्यको प्रशंसा गरे । प्रदेश सांसद लिलम बस्नेतले वडा नम्बर ७ लाई पनि जोड्ने गरी प्रदेश सरकारद्वारा प्रदेश गौरवको सडक योजना सञ्चालन भएको स्मरण गराए । नगरप्रमुख द्वारिकलाल चौधरीले टुक्रे योजनाबाट द्रुत विकास नहुने देखेर तीन वर्षको बजेट जोहो गरी वहुवर्षे सडक निर्माण गरिएको बताए । उद्घाटन कार्यक्रममा वडा नम्बर ७ का वडाध्यक्ष नर बहादुर राई र वडा सदस्य देव नारायण चौधरी लगायत बोलेका थिए ।
