_1725945816.gif)
धरान : धरान-९ स्थित टप युनिभर्सल एकेडेमीको खेल सप्ताह सुरु भएको छ। गत मङ्गलवारबाट सुरु भएको खेल सप्ताह अन्तर्गत मिनी म्याराथन दौड र भलिबल खेल सम्पन्न भएको छ।
शुक्रवार भएको मिनी म्याराथनमा पुरुषतर्फ विज्ञान विषयको ब्रिज कोर्ष गरिरहेका विद्यार्थी साइतो लिम्बु प्रथम भएका थिए । यस्तै करुण श्रेष्ठ दोस्रो र सञ्जय तामाङ तेस्रो भएका थिए । महिलातर्फ स्टाफ नर्सिङकालागी तयारी कक्षा गरिरहेका छात्रा प्राश्ना श्रेष्ठ प्रथम भइन । यसैगरी आरती यादव दोस्रो र कृष्मसा राई तेस्रो बनिन् । एकेडेमीको कार्यालयबाट सुरु भएको म्याराथन भानुचोक हुँदै छाताचोक, सिंहदेवी लाइन, पुरानो बजारबाट माछाभौडी हुँदै पुनः भानुचोकबाट एकेडेमीको कार्यालयमा आएर सम्पन्न भएको थियो । दौडमा एकेडेमीमा अध्ययनरत एक सय भन्दा बढी विद्यार्थी सहभागी थिए ।
दौड सुरु हुनु भन्दा अगाडी विद्यार्थीहरूलाई ट्राफिक प्रहरी सहायक निरीक्षक नारद प्रसाद दाहालले ट्राफिक सचेतनाका बारेमा जानकारी गराएका थिए । भर्खरै एसइई दिएर ब्रिज कोर्ष गरिरहेका विद्यार्थी भएकाले विशेष गरी लाइसेन्स र मोटरसाइकल चलाउँदा हेल्मेटको महत्त्वको बारेमा बताएका थिए । यस्तै दौडँदा अपनाउनु पर्ने सावधानीको बारेमा समेत सचेत गराएका थिए । मिनी म्याराथनको सहजिकरणका लागी प्रहरी सहायक निरीक्षक नारायणप्रसाद लुइँटेल र प्रहरी वरिष्ठ हवलदार टेकबहादुर श्रेष्ठको समेत उपस्थिति रहेको थियो ।
खेल सप्ताह अन्तर्गत नै गत मंगलबार धरान ९ स्थित समिट हाईयर सेकेन्डरी स्कुलमा भलिबल खेल सम्पन्न भएको थियो । दुई टिम सहभागी रहेको खेलमा टिम १ ले टिम २ लाई २८-२६, २३-२५ र २५-१८ को सेटमा पराजित गरेको थियो । टिम १ मा विद्यार्थी सुशील साह, प्रशान्त तामाङ, आदर्श लिम्बु, सुलभ शाक्य, नामशारा मगर र एमि राई रहेका थिए । यस्तै, टिम २ मा करुण श्रेष्ठ, साइतो लिम्बु, सञ्जय तामाङ, तिलक दाहाल, इस्मिनी लिम्बु र स्वच्छता योगी रहेका थिए ।टप युनिभर्सल एकेडेमीमा ब्रिज कोर्ष गरिरहेको विद्यार्थीको सर्वाङ्गीण विकासका लागी हरेक वर्ष अतिरिक्त क्रियाकलाप अन्तर्गत विभिन्न खेलहरू गराउँदै आएको एकेडेमीका प्रबन्ध निर्देशक प्रकाश लकान्द्रीले जानकारी गराएका थिए । खेल सप्ताह अन्तर्गत अझै बास्केटबल र फुटसल खेल बाँकी रहेको बताउँदै विजेताहरूलाई बिदाइको बेला पुरस्कार समेत वितरण गरिने उनले बताए ।
