_1725945816.gif)
धरान : नेपालका आदिवासी समुदायमा संस्कृति पुनर्जागरण बढेसँगै नेपाली समाजमा उनीहरूका मौलिक खानपिन, पहिरन, सङ्गीतका साथै प्रतीकहरू सामाजिकीकरण हुने क्रममा छ । कतिपय कुराहरू लोकप्रिय बन्न थालेका छन् । यसै क्रममा सांस्कृतिक प्रतीक चिन्ह सिलाम साक्माको प्रचलन पछिल्लो समय बढ्दै गएको पाइन्छ ।
आदिवासी समुदायका सार्वजनिक समारोहहरूमा सम्मानका रूपमा लगाइदिने यो प्रतीक चिन्ह लिम्बु समुदायको धार्मिक, सांस्कृतिक प्रतीक चिन्ह हो । मुन्धुममा सिलाम साक्मा मृत्यु छेक्ने शक्ति भएको यन्त्रको रूपमा वर्णन गरिएको पाइन्छ । यसको प्रचलन बढ्दै गएपछि व्यवसायीक रूपमा पनि उत्पादन हुन थालेका छन् र सुनको सिलाम साक्मा पनि बन्न थालेको छ ।
नेपालकै मौलिक पहिचानको यो प्रतीक चिन्ह बनाउने सिपलाई आयमूलक बनाउन सकिने भएकाले लिम्बु विद्यार्थी मञ्चद्वारा कलेजका विद्यार्थीहरूलाई सिलाम साक्मा बनाउने प्रतिक्षण सञ्चालन गरिएको छ । शनिवार देखी सुरु भएको तालिममा ४५ जना विद्यार्थीहरू सहभागी छन् । उनीहरूलाई ३ दिनमा सिलाम साक्मा बनाउन दक्ष बनाइने छ ।
सिलाम साक्मा रङ्गिन धागो बाँसका सिन्कामा चौकोणमा बुनेर बनाइन्छ । मुन्धुम अनुसार धागोका डोराको सङ्ख्यामा ध्यान दिनु यसको महत्त्वपूर्ण पक्ष हो । प्रशिक्षक गोपीलाल लिम्बुका अनुसार ९ डोराको सिलाम साक्मा मुन्धुम सम्मत हुन्छ । पछिल्लो समय सिलाम साक्मा बनाउँदा डोरको ख्याल नगरिने प्रवृत्ति बढेको उनले बताए ।
प्रशिक्षणको उद्घाटन गर्दै लिम्बु विद्यार्थी मञ्चका केन्द्रीय उपाध्यक्ष राजेश इवाहाङले लिम्बु जातिको सांस्कृतिक पहिचानको सिलाम साक्मा आम्दानीको श्रोत हुने भएकाले विद्यार्थीहरूलाई त्यस्तो उपयोग गर्न प्रोत्साहका लागि सिप सिकाउने कार्य गरिएको बताए । यसले संस्कृतिप्रति लगाव बढाउने र आयमूलक काम पनि हुने उनको भनाई थियो ।
सिलाम साक्मा अध्येता हितराम तिलिङले यसको मुन्धुमी पक्षमा प्रकाश परे । किरात याकथुङ चुम्लुङका पार्षद् ताजुब लिम्बु, जिल्ला अध्यक्ष कुमार हुक्पाचोङबाङ, वरिष्ठ पत्रका हर्ष सुब्बा लगायतले सिलाम साक्माको पहिचान, संस्कृतिका बारेमा प्रकाश परे । मञ्चका जिल्ला अध्यक्ष हरि इवाहाङ लिम्बुको सभापतित्वमा भएको समारोहमा मञ्चका केन्द्रीय उपमहासचिवव्दया सरगम सागर चेम्जोङ, प्रदीप नेयोङ लिम्बु लगायतको उपस्थिति थियो ।
