झापा : भद्रपुर झापा गोल्डकपको फाइनल समीकरण पुरा भएको छ । 
आज भएको अन्तिम सेमिफाइनल खेलमा विभागीय टोली एपीएफलाई १-० ले पराजित गर्दै मच्छिन्द्र क्लबले फाइनलमा स्थान बनाएको हो । उसका लागि खेलको पहिलो हाफको १६ औँ मिनेटमा सुजल श्रेष्ठले गोल गर्दै मच्छिन्द्रलाई उपाधि नजिक पुर्‍याएका हुन् । 
भद्रपुर नगरपालिकाको संरक्षणमा मेची रङ्गशालामा जारी अन्तिम सेमिफाइनल खेलमा एपिएफ गत वर्षको लिग च्याम्पियन टोली मछिन्द्रसँग १-० ले पराजित भएसँगै घर फर्किएको छ । मछिन्द्रले भर्खरै सातौँ राजर्षि जनक कप फुटबलको उपाधि जितेर झापा आएको थियो । अब मङ्गलवार उपाधिका लागि आर्मी र मच्छिन्द्र आमेन सामने हुनेछन् ।
गोल्डकपमा तीन विदेशी टोलीसहित १० टिमको सहभागिता रहेको आयोजक समितिका अध्यक्ष दीपेश ढकालले जानकारी दिए। गोल्डकपको विजेता टोलीले नगद १३ लाख र उपविजेताले नगद ७ लाख रुपैयाँ पाउने आयोजकले जनाएको छ ।
प्रतियोगिताको प्रत्येक खेलको प्लेयर अफ द म्याचले नगद २० हजार पाउनेछन् । उत्कृष्ट गोलरक्षक, उच्च गोलकर्ता, उदयमान खेलाडी, उत्कृष्ट डिफेन्डर, उत्कृष्ट मिडफिल्डर, उत्कृष्ट फरवार्ड, फाइनल खेलको पहिलो गोलकर्ता र प्रशिक्षकलाई २५ हजार दिइने आयोजकले जनाएको छ ।
प्रतियोगिताको सर्वोत्कृष्ट खेलाडीलाई नगद एक लाख रुपैयाँ दिइने आयोजकले जानकारी दिएको छ।