_1749430366.gif)
इटहरी : उद्योग वाणिज्य सङ्घ इटहरीको पदस्थापन सम्पन्न भएको छ । इटहरी उवासंघको भवनमा निर्वाचित अध्यक्ष र सदस्यहरूले पद तथा गोपनीयताको शपथ लिएका हुन् । निर्वाचन समितिले निर्वाचित सदस्यलाई प्रमाणपत्र प्रदान गरेको छ ।
पदभार ग्रहण सँगै २१ वटा उपसमिति गठन गरेका नवनिर्वाचित अध्यक्ष जीवन पराजुलीले पदाधिकारी समेत मनोनीत गरेका छन् । महासचिवमा विनोद पौडेल, उपाध्यक्षमा सविना कोइराला र विष्णु नारायण डाँगी, कोषाध्यक्ष सन्नी चौधरी, सचिवमा अशोक मोर र सिनेट रिजाल चयन भएका छन् । नवनिर्वाचित पदाधिकारीले शपथ ग्रहण गरेकै दिन नेकपा एमाले निकट व्यवसायीले भने विरोध जनाएका छन् । उवासंघको विधान विपरीत संस्था चलाउन खोजेको भन्दै विरोध गरेका हुन् ।
निर्वाचित सदस्य सँगै उपसमितिका संयोजकको पदस्थापन भएकोमा उनीहरूको विरोध छ। बाहिरका व्यवसायीलाई निर्वाचित सदस्य सँगै राखिनु अपमान भएको एमालेको ठहर छ ।
संस्थाको विधानको परिच्छेद ४ को दफा १५ मा ९ जना पदाधिकारी रहने सचिवालय समिति अध्यक्षको अध्यक्षतामा गठन हुनुपर्ने भएपनि अध्यक्षले स्वघोषणा गरेको एमालेले बताएको छ । सोही दफाको उपदफा ४ मा उपसमिति गठन गर्दा कार्यसमितिको बैठकबाट निर्णय गर्नुपर्ने व्यवस्था भए पनि अध्यक्षले स्वघोषणा गर्नु गलत भएको एमालेको तर्क छ । उद्योग सचिवमा पनि वाणिज्यकै सदस्यलाई चयन गरिएको भन्दै एमाले निकट व्यवसायीहरू विरोधमा उत्रिएका हुन् ।
पदस्थापनकै दिन इटहरी उवासंघमा किचलो देखिएपछि व्यवसायीहरू निराश भएका छन् । उद्योगी व्यवसायीको हकहितको मुद्दा लिएर निर्वाचित भएको कार्यसमितिमा मत विभाजन देखिएको हो ।
