इटहरी : नेपाल प्रेस युनियन केन्द्रीय अध्यक्ष शिव लम्सालले चैत मसान्तभित्र जिल्ला शाखाको अधिवेशन सम्पन्न गर्नै पर्ने बताएका छन् । कोशी प्रदेश समितिको पदस्थापन कार्यक्रममा बोल्दै उनले निर्धारित समय भित्र अधिवेशन हुने बताए । 
विगतमा लामो समयसम्म अधिवेशन नहुने र सङ्गठनलाई अस्थिर बनाउने खेलको अन्त्य भएको उनले प्रष्ट पारे । फाल्गुन २५ सम्म सदस्यता नवीकरण र नयाँ सदस्यको फारम बुझाउने समय निर्धारण गरिएको भए पनि केही दिन थप गर्न सकिने बताए । 
'विधान अनुसार विगतमा काम भएन भन्दैमा अब त्यही बाटोमा युनियन जान सक्दैन । गुटको प्रभावबाट प्रेस युनियन चल्दैन । अब फाइल बढुवा हुने काम हुँदैन । अब कार्यसम्पादनका आधारमा मूल्याङ्कन हुन्छ' उनले भने । 
पत्रकारको हित र लोकतान्त्रिक मान्यताको पक्षमा लाग्ने बाहेक अन्य क्षेत्रमा प्रेस युनियनको संलग्नता नहुने उनको भनाइ छ । सङ्गठनलाई आँच आउने काम गर्नेलाई माफी नहुने बताउँदै उनले पत्रकारको क्षमता विकासमा लाग्न आग्रह गरे ।