धरान : हिबिस्कस इङ्लिस बोर्डिङ स्कुलले वार्षिकोत्सवको अवसरमा कपुरीकी पत्रकार रश्मि प्रधानलाई सम्मानित गरेको छ ।

धरान-१५ स्थित स्कुलमा आइतबार भएको वार्षिकोत्सवमा प्रधानलाई नगद ५ हजार सहित प्रमुख अतिथि कोशी प्रदेश सभा सदस्य रमेशकुमार बस्नेतले दोसल्ला ओढाई सम्मान गरेका हुन ।

समारोहमा २०८० सालको नर्सरी देखी कक्षा ११ सम्म वार्षिक परीक्षामा प्रथम, दोस्रो र तेस्रो हुने विद्यार्थीहरू र खेलकुदमा उत्कृष्ट हाउसलाई पुरस्कार र प्रमाण-पत्र वितरण गरियो ।

सो अवसरमा सांसद बस्नेतले निजी स्कुलहरूले शिक्षा क्षेत्रमा ठुलो योगदान पुर्‍याएको बताउँदै समुदायमा शिक्षाको प्रभाव छरेको बताए । समुदायसँग मिलेर निजी विद्यालयहरू अघि बढेकोले निजी विद्यालयप्रति अभिभावकहरू आकर्षित भएको उल्लेख गरे ।

धरान-१५ का वडा अध्यक्ष नरेश इवारम, पत्रकार महासङ्घ सुनसरीका अध्यक्ष जनक ऋषि राई, श्यामचोक युवा समाजका अध्यक्ष ललित योन्जन, श्यामचोक समाजका अध्यक्ष दिनेश रानामगर, लगायतले बिद्यार्थीहरुलाई पुरस्कार वितरण गरेका थिए ।

स्कुलका प्रबन्ध निर्देशक गङ्गाराम कुलुङको अध्यक्षतामा भएको कार्यक्रम सञ्चालन शिक्षक नयन राईले गरेका थिए ।