धरान: डेंगु ज्वरोले प्रकोपकोरुप लिएपछि एक साता भित्र शुन्यमा झार्ने लक्ष्य लिएर धरान उपमहानगरपालिकाले कार्ययोजना बनाएर लागि परेको शनिबार एक साता भयो ।
एक सातामा जनपथ प्रहरी, सशस्त्र, नगर प्रहरीसहितको टोली वडास्तर र टोलस्तरमा गठन भएको सर्च एण्ड डिष्ट्रोय अभियानमा लागेको थियो । कार्यवाहक मेयर मञ्जु भण्डारी सुवेदी आफै पनि विभिन्न वडा र टोलमा पुगेर बेला बेला अभियानको अनुगमन पनि गरिन् । लक्ष्य अनुसार डेंगुलाई शुन्यमा झार्न नसकिए पनि एक सातामा धेरै सुधार आएको छ । विपी कोइराला स्वास्थ्य विज्ञान प्रतिष्ठानमा एक सातामा देखिएको पोजेटिम विरामीको तथ्यांक विगतमा एक दिनमै पोजेटिम देखिएको भन्दा कम छ । यसले विस्तारै डेंगुको प्रकोप कम हुदै गएको चिकित्सकहरु बताउँछन् ।
विपी प्रतिष्ठानका सहायक अस्पताल निर्देशक डा.विकास साहका अनुसार एक सातामा मात्र ६५ जना डेंगु पोजेटिभ विरामी भएको अस्पतालको रिपोर्ट छ । असार १ गतेदेखि ६ गतेसम्मको यो तथ्यांकले धरानमा डेंगुको प्रकोप घट्दो क्रममा रहेको देखिएको डा.साह बताउँछन् । ‘जेठमा त एकै दिन झण्डै १०० को हाराहारीमा विरामीहरु आएका थिए, अहिले ७ दिनमा ६५ जना मात्र पोजेटिभ आउनु भनेको धेरै नै कम हो,’डा.साहले भने,‘सबैको पहलले गर्दा ७ दिनमा १० गुणा कम भएको छ, अभैm शुन्यमा झार्न अभियानलाई नियमित गर्नुपर्छ ।’
प्रतिष्ठानको तथ्यांक अनुसार बैशाख ३१ गते विपी प्रतिष्ठानमा एक जना डेंगु पोजेटिभ विरामी देखिएका थिए भने जेठ महिनामा मात्र ६ सय ३१ जना पोजेटिभ थिए । ती सबै अहिले निको भइसकेका छन् । डेंगुको भाइरस सामान्यतया एक सातासम्म मानिसको शरीरमा रहन्छ । त्यसपछि अझै नष्ट हुने चिकित्सकहरु बताउँछन् । ‘डेंगु भयो भने विरामीलाई एक सातासम्म झुलभित्र अरु मच्छडले नटोकोस् भनेर राख्नुपर्छ, जसले गर्दा भाइरस अरु सामान्य मच्छडमा नसरोस्, र त्यसले अरु मानिसलाई पनि नसारोस्,’डा.साहले भने ।
धरानकी कार्यवाहक मेयर भण्डारीले प्रत्येक वडामा लार्भा नष्ट गर्ने अभियानलाई कडाईका साथ लागु गरिएकोले धेरै हदसम्म नियन्त्रणमा आएको बताइन् । ‘छतदेखि भुँईसम्म भन्ने नारा दिएर जमेको पानी फाल्ने र लार्भा नष्ट गर्ने अभियान चलाइरहेका छौं, यो अझै निरन्तर रहन्छ,’उनले भनिन्,‘प्रतिफल पनि देखिएको छ । तर, पानी पनि पर्न थालेकोले पोष्ट मनसुनको चिन्ता पनि छ ।’ पोष्ट मनसुनको लागि अहिलेदेखि नै सचेत भएर लागिपर्ने उनले बताइन् ।