जताततै असिना पानी (फोटो फिचर)

धरान(डेस्क): बुधबार पर्यटन मन्त्री रवीन्द्र अधिकारी, पर्यटन व्यवसायी, नागरिक उड्यान प्राधिकरणका उच्च अधिकारीसहित ७ जनाको हेलिकप्टर दुर्घटनामा परी निधन भएको थियो । एक जुझारु, कर्मशील र सम्भावना बोकेका युवा नेता तथा सँस्कृति, पर्यटन तथा नागरिक उड्यान मन्त्री अधिकारीको निधनले देश स्तब्ध बन्यो ।

मन्त्रीपरिषदले आकस्मिक बैठक बसेर आज बिहीबार राष्ट्रिय शोक घोषणा गर्दै सार्वजनिक विदा पनि दिएको थियो । मन्त्री अधिकारीसहित ७ जना सवार हेलिकप्टर मौषमको खराबीले गर्दा दुर्घटनाको शिकार हुन पुगेको बताइएको छ । आज सरकारले शोक विदा दिएको दिन पनि मौषम मलिन नै रह्यो । आज बिहिबार विहानैदेखि कतै हिउँ पर्यो, कतै पानीसँगै असिना पर्यो ।

धरान, भेडेटार, बराहक्षेत्रलगायत पहाडी र हिमाली क्षेत्रमा असिना पानी र हिमपात भइरह्यो । सामाजिक सञ्जालहरुमा आज हेलिकप्टर दुर्घटनामा ज्यान गुएकाहरुप्रति श्रद्धाञ्जलीसँगै असिना पानी र हिमपातको तस्बिर, सेल्फीले भरिए । सुनसरीको बराहक्षेत्र आसपासका क्षेत्रमा पनि अत्याधिक मात्रामा असिना पर्यो । असिनाले खेतबारी सेताम्य भए । सडक असिनाले भरियो । अत्यधिक असिनाले स्थानीयको तरकारी तथा फलफूल खेतीमा समेत क्षति भएको छ । बराहक्षेत्र नगरपालिकाका वयरवन, चतरा, भन्डारीटार, चतराघाट, चावाचा, अर्चले लगायतका ठाउँमा अत्याधिक मात्रामा असिना परेको थियो । स्थानीय भबिन राउतले यो क्षेत्रमा अहिलेसम्मकै ठूलो मात्रामा असिना परेको बताउँदै भने,‘यत्तिको असिना परेको अहिलेसम्म थाहा थिएन ।’

धरानमा पनि बिहान करिब १० बजेतिर अध्यारो भएसँगै असिना पानी परेको थियो । यस्तै, भेडेटारमा पनि असिना पानी परेर झण्डै ४ इञ्जसम्म असिना जमेको होटल एशोसिएशन भेडेटारका अध्यक्ष जितेन्द्र रुम्दालीले बताए । ‘आज ४ इञ्च जति बाक्लो असिना पर्यो, यस्तो त नहुनुपर्ने थियो,’उनले भने,‘पर्यटनको लागि मौषम प्रतिकुल भइदियो, पर्यटकहरुको संख्या ज्यादै न्युन छ ।’