थुनुवा कक्षसहित नमुना अस्थायी प्रहरी चौकी बन्दै

धरान:इलाका प्रहरी कार्यालय धरानको हाताभित्र धराने जनताको लगानीमा नमुना हिरासत भवन निर्माण भइरहेको छ । जहाँ अभियोग अनुसार प्रहरीले अनुसन्धानको लागि नियन्त्रणमा लिएकाहरुलाई छुट्टा छुट्टै राख्ने व्यवस्था हुनेछ ।

यो बाहेक पनि धरानको वडा नं १५ मा जनताको लगानीमा अर्को अस्थायी प्रहरी चौकी निर्माण भइरहेको छ । त्यो पनि पुर्ण जनताको सहयोगमा हो । यो चौकीको बिशेषता के हो भने यहाँ पनि थुनुवा कक्ष हुनेछ । महिला र पुरुषलाई छुट्टा छुट्टै राख्ने थुनुवा कक्षसहित अस्थायी प्रहरी चौकी निर्माण भइरहेको निर्माण समितिका संयोजक हिमाल दाहालले जानकारी दिए । यो भवन सम्भव भएसम्म बैशाखमा उद्घाटन गर्ने लक्ष्य राखिएको छ ।

अध्यक्ष दाहालका अनुसार ती थुनुवा कक्षमा महिला र पुरुष १०/१० जना अट्ने क्षमता हुनेछ । ‘नमुना अस्थायी प्रहरी चौकी बनाउने हाम्रो लक्ष्य छ, अनुसन्धानको लागि समातेर ल्याएकाहरुलाई तत्काल इलाका र वडा प्रहरीमा पुर्याउन नसकेको अवस्थामा यही राख्ने भनेर महिला र पुरुषको अलग्गै थुनुवा कक्ष पनि बनाएका छौ,’अध्यक्ष दाहालले भने,‘८५ प्रतिशत काम सकिएको छ, यसमा गिरीधारी सापकोटा दाजुको ठुलो सहयोग भयो ।’

यो नमुना प्रहरी चौकी वडा नं १५ को कार्यालय अघि रात्री बसपार्कसँगैको जग्गामा निर्माण भइरहेको छ । प्रहरी चौकी थुनुवा कक्षसँगै बाथरुम र ट्वाइलेट पनि हुनेछ । एउटा बैठक कोठा(कार्यालय), २ वटा बेडरुम र किचन पनि हुनेछ । करिब २७ लाख लागत अनुमान गरिएको थियो । तर, निर्माण गर्दै जादा ३० लाखको हाराहारीमा खर्च पुग्ने निर्माण समिति सदस्य एवं सुनसरी उद्योग वाणिज्य संघका उपाध्यक्ष गिरीधारी सापकोटाले बताए । ‘स्टिमेट गरेको भन्दा केही नयाँ काम पनि गर्नुपर्यो, जिप्सन पनि थपियो, त्यसैले खर्च बढी हुन्छ,’सापकोटाले भने ।

हाल अस्थायी प्रहरी चौकी वडा कार्यालयको एउटा साँघुरो कोठामा छ । जहाँ असईको कमाण्डमा ६ जना प्रहरी बस्छन् । यो चौकी निर्माण भएपछि सुरक्षामा खटिने प्रहरीलाई राहत मिल्नेछ । अहिलेसम्म २५ लाख बढी खर्च भैसकेको छ । यो सबै जनसहयोगबाट हो । धरान उपमहानगरले २ लाख र प्रदेश सरकारबाट १० लाख सहयोगको आश्वासन छ, तर निकासा भइसकेको छैन ।