इनरुवा: सुनसरीको इनरुवाबाट तत्कालीन किष्ट बैंकमा कमसल धितो राखी करोडौ रकम निकाली बैक घोटाला गरेको अभियोगमा तीन जनालाई नेपाल प्रहरीले पक्राउ गेको छ । प्रहरीको केन्द्रीय अनुसन्धान ब्युरो(सीआईबी)ले आइतबार इनरुवा ३ सखुवागाछीका सुरेश भन्ने कुलप्रसाद पोखरेल, इनरुवा २ का प्रमोद देव र अजय देवलाई पक्राउ गरी कानुनी कारवाहीका लागि काठमाडौं लगेको छ । तत्कालिन सिईओ कमल ज्ञवालीलाई गत असोज १९ गते भारतबाट पक्राउ गरेपछि यो घटनाका रहस्यहरु खुल्दै जाने क्रममा इनरुवाका पनि पक्राउ परेका हुन् ।

इनरुवाकै थप अन्य व्यक्तिहरु पनि फरार सूचिमा रहेका छन् । कमसल धितो राखेर अनाधिकृत ऋण प्रवाहका गरी घोटाला गरिएको चर्चित प्रकरणका मुख्य नाईके रहेका बैंकका तत्कालिन नायव महाप्रबन्धक बीएन घर्ती र डेपुटी जनरल म्यानेजर प्रविन श्रेष्ठ पक्राउ परिसकेका छन् । इनरुवा ३ का घर भएका रोशन राईस मिल कम्पनी संचालक कुलप्रसाद पोखरेलको नाममा शुरु कर्जा रकम १२ करोड ८० लाख र हालसम्मको बक्यौता रकमसहित १८ करोड ७१ लाख ३१ हजार ७३२ रुपैयाँ ९९ पैसा रहेको छ ।

यस्तै, इनरुवा २ मा अशोक प्रभासित भण्डारका संचालकद्धय प्रमोदकुमार देव र अजयकुमार देवका नाममा पनि बक्यौता रकम १६ करोड ९६ लाख ६७ हजार ६६९रुपैयाँ ६४ रहेको छ । उनीहरुमाथि पैसा असुल उपर गर्न माग दावी गरी बैंकिङ कसुर मुद्दामा बैंकका जिम्मेवार कर्मचारीहरु, ऋणीहरु र धितो मुल्यांकनकर्ता समेतले एक आपसमा मिलेमतो गरि बैंकिङ कसुर गरेको देखिएकाले अनुसन्धानका लागि अदालतबाट म्याद थप गरी अनुसन्धान सुरु गरिएको प्रहरी नायव उपरीक्षक श्यामवाबु ओलीले जनाएका छन । प्रहरी स्रोतका अनुसार सुनसरी इनरुवा घर भएका तुलसीप्रसाद खनाल, कालिप्रसाद शर्मा, शोभा गिरी, कमल सिटौला, संजयमुर्ती कोइराला, सीता खरेल, बालकुमार पाण्डे, श्यामसुन्दर ढकाल, मधुसुदन शर्मा, रेणुप्रसाद पाण्डे, वामदेव नेपाल, सुनयन शाक्य, नविन राई र मेरु जोशी अझै फरार रहेकाले उनीहरुको खोजीका लागि प्रहरी परिचालन गरिएको छ ।

पुनरावेदन अदालत पाटनमा नेपाल राष्ट्र बैंक बादी रहेको ०७०–सीबी–००६७ र ०७०–सीबी–००७० नम्बरको बैंकिङ कसुरको अभियोग मुद्दामा उनीहरुसँगै सुनसरीका आधा दर्जन प्रतिवादी १९ अर्ब ३५ करोड ५५ लाख ४१ हजार तीन सय ४२ रुपैयाँ सात पैसा बिगो रकम माग दाबी गरिएको छ । सोही मुद्दामा पक्राउ परेका ९९ जना व्यक्तिहरुलाई अदालतमा हाजिर गराएको सीआईबीले जनाएको छ । प्रहरी स्रोतका अनुसार राष्ट्र बैंकको पत्रका आधारमा वाणिज्य बैंक, विकास बैंक र फाइनान्स कम्पनीसमेतमा गरी २८ संस्था घोटाला प्रकरणमा संलग्न भएको अभियोगमा ती व्यक्तिहरु पक्राउ परेका हुन् ।