धरान : मोरङको लेटाङ-५, खेरुवा वरपरको क्षेत्रमा सोमबार बिहान ७ बजेदेखि अर्को आदेश जारी नहुन्जेल सम्मका लागि जिल्ला प्रशासन कार्यालय मोरङले कर्फ्यु लगाएको छ।
शिक्षकले विद्यार्थीलाई यौन दुर्व्यवहार गरेको विषयमा भएको झडपमा एक जना महिला प्रहरीको ज्यान जाने गरी भएको आइतबारको झडपपछि स्थिति तनावपूर्ण बनेकाले लेटाङमा कर्फ्यु आदेश जारी गरिएको प्रशासनले जानकारी दिएको छ । लेटाङको वडा ३ र ४ को पश्चिम एरिया गङ्गे चोक र कमलपुर क्षेत्र, ५ वडाको सबै क्षेत्र, उत्तरमा लेटाङको ६ नम्बर वडा कार्यालय क्षेत्र, पूर्वमा मोरङे खोला क्षेत्र, पश्चिममा चिसाङ खोला क्षेत्रमा कर्फ्यु लगाएको प्रमुख जिल्ला अधिकारी काशीराज दाहालले जानकारी दिए ।
उक्त घटनामा एक महिला प्रहरी जवानको निधन हुनुका साथै करिब २८ जना घाइते भएका छन् । तीमध्ये केही सामान्य र केही गम्भीर घाइते रहेको प्रहरीको भनाइ छ । घाइतेको मोरङको विभिन्न अस्पतालमा उपचार भइरहेको छ ।
यौन दुर्व्यवहार आरोपी शिक्षकलाई पक्राउ गर्न पुगेको प्रहरी टोलीमाथि मोरङको लेटाङमा आक्रमण भएको थियो । यौन दुर्व्यवहार आरोपी लेटाङ नगरपालिका-५ को शिक्षा विकास माध्यमिक विद्यालयका शिक्षक मनोज पौडेललाई पक्राउ गर्न पुगेको प्रहरी टोलीमाथि आक्रमण भएको हो ।
