धरान: भोगाधिकार पाएको जग्गा लिजमा दिएर नक्सा पास र इजाजत विना निर्माण भइरहेको फनपार्क उपयुक्त ठाउँमा स्थानान्तरण गर्न माग गर्दै बिपी प्रतिष्ठान–डिपो बचाउ संघर्ष समितिले बिहिबार र्याली निकालेका छन् ।
फनपार्कसँगै डिपो र इजी राइडर गु्रप बिजनेश प्रालिबीचको सम्झौतामा भएको अन्य संरचनाहरु निर्माण हुदा अस्पताल क्षेत्र र डिपोकै शैक्षिक गतिविधि, वातावरणमा दीर्घकालिनरुपमा असर पर्ने भएकोले त्यहाँबाट अन्यत्र सार्नुपर्ने संघर्ष समितिले आग्रह गर्दै आएको छ । बिपी प्रतिष्ठानका शिक्षक(फ्याकल्टी), कर्मचारी, चिकित्सक एवं विद्यार्थीहरुको आधिकारिक संगठनहरु मिलेर बिपी तथा डिपो बचाउ संघर्ष समिति गठन गरेकय थिए । उक्त समितिले नै चरणबद्ध आन्दोलनको घोषणा गरेअनुरुपमा आज सांकेतिक र्याली निकालेका हुन् ।
सरकारले बिपीको नाममा भएको जग्गा भोगाधिकार मात्र रहने गरी डिपो स्कुललाई दिएको र त्यहाँ उसले आफुले मात्र शैक्षिक प्रयोजनको लागि उपभोग गर्न पाउने बिपी प्रतिष्ठान, उपमहानगरपालिका, जिल्ला प्रशासनलगायत निकायहरुले भन्दै आएको छ । यस्तै, ३० बर्षे लिजमा कम्पनीलाई दिएको सार्वजनिक जमिन भविष्यमा फिर्ता हुन नसक्ने भन्दै सर्वत्र आलोचना पनि भइरहेको छ । डिपो आफै विश्वविद्यालय बन्ने सपना देखिरहेकोले भविष्यमा आफैलाई चाहिने जमिन यसरी निजी कम्पनीलाई लामो समयको लागि लिजमा दिन नहुने संघर्षरत पक्षको भनाई छ । ‘डिपोटले छोटो समयको लागि हुने लाभ हेरेर लिजमा दिएको छ, तर भविष्यमा उसैलाई वेफाइदा हुनेछ,’संघर्ष समितिका संयोजक एवं डा.विष्णु पोख्रेलले भने,‘शिक्षामा नयाँ नीति र अभ्यासहरु आएको छ । विद्यार्थीहरुलाई प्राक्टिल खेती गराउन ठाउँ हुदैन, स्कुल बढ्दै गएपछि खेल मैदान हुदैन । खाली जग्गाहरु त अहिले जोगाउनुपर्छ । संरचना बनाइहाल्नुपर्छ भन्ने छैन ।’
संघर्ष समितिका सचिव सुजेन्द्र गोले तामाङले बिपीसँगको सम्झौता र नेपाल सरकारले अनुमति दिदा पनि शैक्षिक प्रयोजनबाहेक व्यापारिक प्रयोजनमा जग्गा उपयोग गर्न डिपोले नपाउने भएकोले आफुहरुले खबरदारी गर्नुपरेको बताए । ‘अहिले बिपीको व्यवस्थापन पक्ष विविध कारणले कमजोर छ, त्यसैले हामीले यो कदम चाल्न बाध्य हुनुपर्यो,’उनले भने,‘सम्बन्धित निकायहरुको ध्यानाकर्षण होस, निर्णय पुनविचार गरेर डिपोले सम्झौता रद्द गरोस् भन्ने चाहन्छौं ।’
र्यालीमा बिपीका वरिष्ठ शिक्षक चिकित्सक डाक्टरहरु, विद्यार्थी, नर्स र कर्मचारीहरु सहभागी थिए । जिओपिडीबाट शुरु भएको र्याली डेन्टल, शिवमार्ग, बुद्धचोक, रत्नचोक हुदै फनपार्क निर्माणस्थलमा पुगेको थियो । त्यहाँ केहीबेर फनपार्क सारौं, बिपी डिपोट बचाउ भन्ने नारा लगाएर र्याली पुनः जिओपिडीअघि पुगेर टुंगिएको थियो । संघर्ष समितिका अनुसार अब हस्ताक्षर संकलन गरेर सरोकारवाला निकाय, प्रधानमन्त्री कार्यालयमा बुझाउने, अख्तियारमा सामुहिक उजुरी गर्ने र नागरिक संवाद गर्ने कार्यक्रम तय भएको छ ।